كذبـــة اليــــوم:
1-أشعر بسعادة تغمرني برغم عدم وجودك...
2-توقفت عن البحث عنك حيث كنت أجدك
3-توقفت عن الاعتراف بالحقائق المتعلقة بأمرك
4-توقفت عن احتياجك وافتقادك
والكذبة الكبرى لهذا اليوم أنني..توقفت عن حبك
...............
خرجت يوم الجمعة اخذاً بنصيحة أحد أصدقائي
لما قالي إن الحل لمشكلتك إنك تعملي حاجة مجنونة
كان يوم مش مخطط وعملت كل حاجة جت في دماغي
...جيجي كانت معايا
من غيرها مكنتش اتجرأت اخرج بره منطقة الامان واعمل تجديد
معملناش حاجات كتير زي ما انا حاسة بس عملت كل اللي خطر في بالي يوميها
(ماعدا اني اطير طيارة من فوق البرج..وانط في النيل واروح بانجي جمبنج)
..شربنا عصير جرجير!! اه والله
حد قالهم يحطوه في المينيو اليوم ده بالذات؟؟ يستاهلوا..
الوايتر بصلنا باستغراب وهوا بيحط فراولة وجرجير ولمون ..
لقيت نفس القطة الاورانج اللي كنت ببسبسلها يوم ما رحت مع لولو هناك قبلها باسبوعين
وطلعت في دماغي جدا اجيب قطة صغيرة
المكان ده رحته كتير قعدت نفس القعدة قدام النيل
في نفس التوقيت السنة اللي فاتت تقريبا
وكنت بسمع افكاري الشخصية..لوحدي
يمكن الاختلاف المرة ديه ان جهاد وجودها حسسني بنوع من الالفة
انا كنت مع نفسي لأنها شبهي في حاجات كتير
أو انا اللي شبهها بحكم انها اكبر مني ب 24 ساعة :)
واحنا راجعين منزلناش محطة المترو بتاعتنا نزلنا ف محطة قبليها واخدناها مشي
أكلنا من مؤمن ووصلت جهاد وكملت لحد بيتنا
روحت حاسة بحرية اوي..استمرت لحد الساعة 12 بالليل
كانوا كفايا عشان اهدى حبة
تاني يوم السبت المستر ادانا درجات امتحان الفيزيكس
جبت الفل مارك ..بس تعرف مفرحتش
مبقتش افرح بالحاجات ديه زي زمان..
برغم ان الطبيعي ان افرح بانجاز رهيب زي كده
طبعا النهارده كان يوم قاتل عشان مبروحش فيه غير الساعة 7
وبكرة عندي درس الساعة 6.. هيبقى الدنيا ضلمة
حسيت النهارده وانا راجعة للبيت ف نفس التوقيت بتوجس خفيف
شكلي بكرة هطلب من أحمد ييجي يوصلني بالعربية
..من امتى وانا بخاف من الضلمة؟ ولا بخاف من الشوارع الواسعة اللي مفيهاش غير عربيات؟
مش عارفة حقيقي
بحاول اقرا قرآن كل يوم وقبل ما انام بسيبه شغال عشان ابعد الاحلام الوحشة
بس مش بعرف
الحقيقة اني بقيت خايفة من الكوابيس اللي بشوفها اليومين دول
خايفة عشان عارفة انها هتتحقق
اضطرابات في دماغي غريبة ورجع احساسي باني نايمة بس مش نايمة
ببقى نايمة وفي نفس الوقت بفكر
ولما بنام من كتر التعب بتجيلي أحلام وحشة
تعرف..شكلي بدأت أخاف من الموت ..مش موتي بس موت اللي بحبهم
لا وكمان موتي..لأول مرة اخاف من موتي!!
حاسة اني بقيت اتحمل كتير
والناس بقت تعلق غبائها عليا..وكأن انا السبب أنا اللي صعبة الفهم والتعامل
مش بيفكروا ان هما مش قادرين يفهموني
الحمد لله انا كويسة نوعا ما بالنسبة للاسبوع اللي فات
وبحاول مكتبش بقصد اي حاجة ادبية...(ماعدا الشخابيط اللي ف ورق المذاكرة)
مستنية حاجة برضه مش عارفاها تطمني...يارب هونها عليا شوية :)
