5.12.10

الخاطبة


بصلي بجدية شديدة وقالي بسذاجة طفل معداش الــ 7 سنين

- تعرفي انتِ مش فاهماني ولا عارفة انا عاوز ايه
وعمرك ما هتقدري تميزي البنت اللي بحلم بيها..

- جرب ومش هتندم  قول لي المواصفات وأنا أدلك على اللي انت عاوزها.

- بصي يا ستي ..أنا عاوز بنوتة تكون غير عادية
استثنائية من وجهة نظري مش من وجهة نظر أي حد وأقصد بالحد ده انتِ

-حاسب على كلامك !!!

- ده الواقع ..أصلك بديهي مش هتفهمي عشان مجربتيش ..
مجربتيش إنك تحاولي طول عمرك تمسكي في الحاجات بإيديكي وسنانك 
وفي الآخر الحاجات ديه بتهرب منك وتروح لحد ميستحقهاش 

البنت اللي عاوزها هتكون عكس كل الحاجات اللي ضاعت مني

وقت ما احتاج أضحك..هلاقيها معايا بتضحك مهما كانت تعبانة 
ولما أغضب..الاقيها بتفور علشاني ومش بتبخل بأي حاجة
ولما  أحب أبعد عنها حبة أرجع ألاقيها زي ما هيا..
متغيرتش ولو لحظة مهما أنا اتغير عليها

عارفة كمان أنا عاوزها تكون باردة في الصيف
ومعايا في الشتا بتديني لسعة برد لذيذة
عاوزها معايا بأي شكل وبكل الطرق..فهمتيني؟؟

-تعرف..اهو انا بس دلوقتي فهمتك
أنت عاوز واحدة معاك وانت لوحدك وعمرها ما ترفض
تفرح وتتهز وقت ما تعوزها مهزوزة

وتفضل تديك بدون أي مقابل..ومتطالبكش بعمل أي حاجة
ولا تطلب منك تقدملها زي ما هي بتقدملك
وتبقى معاك شتا وصيف..مش عشان تدفيك بس عشان تديك لسعة برد لذيذة

- بالظبط كده..تعرفي بنت بقى بالمواصفات ديه؟؟

-طبعآآآآآ... المواصفات المطلوبة لفتاة أحلامك
غير متوفرة غير في إزازة الحاجة الساقعة..عزيزي الشاب
الرجاء عدم المحاولة مرة أخرى 

...

هناك 20 تعليقًا:

اقدم عاصمه فى الحب يقول...

السلام عليكم

جبتى من الاخر معاه
فى إزازه الحاجه الساقعه
.
.
الحب ما هو الا عطاء من الطرفيين
وحشنى الجديد
الله يسامح المذاكره بقه :)
ودى وإحترامى :)
ووره كبييييره لقلبك الطيب :)

اقدم عاصمه فى الحب يقول...

ايه ده انا اول تعليق ...؟!
يا حلاوه يا ولاد ..
تانى مره اكون عند حد اول تعليق
.
طيب
اذا كان كده .. ماشى :)
وش بيطلع لسانه :d

دعاء العطار يقول...

ولما أحب أبعد عنها حبة أرجع ألاقيها زي ما هيا..
متغيرتش ولو لحظة مهما أنا اتغير عليها


ياسلاااااااااااام

الفليبينيه اللى جايه لحضرته هى عشان تبقى تحت امره

ايه المواصفات المستفزه دى

دى مواصفات حد قمه فى الانانيه

كللللل حاجه قالها تدل ع انه عايزها متبرمجه ع مزاجه هو بسسسسس

فعلاً يارودى هيلاقيها فى الحاجه الساقعه

ههههههههههههههه

طالبة مقهورة ..درجة أولى يقول...

أحمد

:) اها الله يسامحها انت مش متخيل انا ورايا حاجات قد ايه بس النت وحشني اوي قلت طظ في كل حاجة وجيت

بس انا نفسي في شوكولاته مش في ورده دلوقتي ينفع ترجع في كلامك :)

هههههههههههههههههه
مبروك ع التعليقين الاول والتاني

طالبة مقهورة ..درجة أولى يقول...

دودوووو

هههههههههههههه فطستيني من الضحك
البوست ده كتبته وانا بضحك على اللي بعمله بس اصلي اتغظت اوي

وحشاني يا عسليتي
:)

عباس ابن فرناس يقول...

انتى مالك يارودى نازلة حامى علينا كدا هههه

اخينا مش بيدور على فتاة احلام

ده بيدور على نفسه

وزى ما قولتى عايز حاجة ساقعة

بس تكون ساقعة قوى زى حلاته كدا

تحية مستعطرة

وشدى حيلك فى المذاكرة

طالبة مقهورة ..درجة أولى يقول...

عباس بن فرناس

اصلها شخصية ترفع الضغط..والانقح بقى انك تقابللها في الواقع

تحس ان نفسك تحدفه بكوباية النسكافيه اللي ف ايدي بس اوعى تعمل كده ^_^

صباحك سكر زيادة
:)

الحسينى يقول...

يطلب من تضحك معه حتى لو كانت متعبة "هل يا ترى سيضحك معها عندما يكون متعب؟" وأن يذهب ويعود وقتما يشاء فيجدها كما هى ما هذه الأنانيه؟ أعتقد أن واحده بهذه المواصفات هى شخص بلا أحاسيس أو دمية
يشتريله واحده صينى بالريموت كنترول :)

ranim يقول...

هههههههههههههههههههه
مسخرة يا روووووودي تحفة موت يا قمري

زي ما انتي متعودة البوست حلو يا رودي وبيقول كلام كتير اوي بين السطور

صباح الابداع

استمري

بحبببببببببببببببببببك يا روووووودي

جايدا العزيزي يقول...

ايووووووووه دى رضوى حبيبتى

دايما تجيبمن الاخر

واللىفيه الصح

وحشانى ياقلبى

كلعام وانت بخير

تحياتى

شمس النهار يقول...

علشان كده اسمها فتاة الاحلام

بس علي فكره في بنات كده كتير جدا
بس ياتري في الشاب اللي كده كمان

وعليكم مثل ماعليهن

طالبة مقهورة ..درجة أولى يقول...

الحسيني

هههههههههه فعلا
بيبصوا من جهة نظرهم وبينسوا ان الموضوع خد وهات وكل ما تدي كل ما هتاخد

بس الفكرة انانية جدا

منورني

طالبة مقهورة ..درجة أولى يقول...

روني

الحمد لله انه عجبك :)
تشربي بيبسي معايا بقى

:)

طالبة مقهورة ..درجة أولى يقول...

جايدا

ربنا يخليكي وانتي طيبة يارب :)

طالبة مقهورة ..درجة أولى يقول...

شمس النهار

تؤ مفيش حد كده
مفيش حد بيحترق عشان انسان تاني بدون اي مقابل
ولو حتى الاحساس بوجود الحد ده

الموضوع فيه انانية كبيرة منه

richardCatheart يقول...

ازيك يارودى وحشانى والله جيت اكتبلك الرد هنا علشان اضمن انك تشوفيه

ان شاء الله تعالى يوم الجمعه الجايه هايوافق 10 فى الشهر

هايكون فى تجمع اسمه بؤجه الخير الشتويه

هنلم هدوم مابنستخدمهاش هانوديها هما فى الجمعيه بيظبطوها ويوزعها

خدى اللينك دا هاتفهمى من اكتر

http://hams07.blogspot.com/

ياريت تقدرى تيجى ونشوفك يارودى
شوفى وابقى قوليلى

Ramy يقول...

رضوى

مالك انا دخلت النت بالصدفة البحتة النهاردة انا بقالى فترة غايب

و يمكن مش هعرف اتابع برضه

بس بوستك الأخير صعب جدا ليه كده يا رضوى

ربنا معاكى و متخافيش صدقينى مفيش فى الدنيا شيىء يخوف

حتى أصعب الظروف و أقساها

ربنا معاكى و و يبعد عنك كل شيىء سيىء

ربنا معاكى يا رضوى

يا ريت تطمنينا ياريت

Heidenröslein يقول...

rody .. you hit the point ..
couldn't agree more ..

something i always wanted too say .. but your way was the best ..
Thanks for this amusing post ..

Thank you very much
:)

عباس ابن فرناس يقول...

كلامك قلقنى يارضوى
متخافيش بسيطة انشاء الله وباذن الله
ابقى طمنينا يارضوى

عباس ابن فرناس يقول...

كلامك قلقنى يارضوى
متخافيش بسيطة انشاء الله وباذن الله
ابقى طمنينا يارضوى