27.11.10

مش قصص بس قصيرة




كان عاوز يغيرها..وهي كان عندها استعداد تتغير علشانه

بس لما حست انها بقت في ايده "عروسة ماريونيت"

تراجعت عن قرارها وقررت تكون نفسها

بس الوقت كان متأخر..متأخر أوي

..........


كان لازم يعرف 3 حاجات قبل ما يحبها

انها غير أي بنت عرفها قبل كده

ان كرامتها فوق أي حد

وإنها مستحيل في يوم من الأيام تحبه

........


وحشتني أوي

كل يوم بصحى الصبح على صوتك بيناديني

بيقولي يللا قومي عشان تبدأي يومك..معايا زي كل يوم

علشان توصلي لهدفك اللي بدأ معانا يوم ما اتقابلنا

قومي علشان النهارده يوم جديد

لبسي مريم لبس المدرسة في أول يوم ليها في كي جي وان

وركبيها الباص وبوسيهالي اوي

ولما ترجعلك حافظة سورة الفاتحة

قوليلها تقراهالي كل يوم قبل ما تنام

ولما تكبر حبة فهميها إن الموت حاجة بسيطة

بالنسبة للحب الكبير اللي بيربطنا في مثلث صغير

..........


هناك 6 تعليقات:

Unique يقول...

ولما تكبر حبة فهميها إن الموت حاجة بسيطةبالنسبة للحب الكبير اللي بيربطنا في مثلث صغير

جميلة جدا :)

عباس ابن فرناس يقول...

وبعدين معاكى
حيرتينى ههههه
مش قصص بس قصيرة !

على الرغم من ان اسلوبك بسيط
لكن موضوعاتك زاتيه جداً !
ويمكن ده هوا سر جمالها !
لذلك ايضاًيمكن هى تتحس اكتر من انها تُستوعب !

عروسة مريونت
العروسة وببساطة قررت انها لن تكون عروسة
سلب الارادة البشرية اهون من القتل
ومن لا يعرف ذلك هوانسان ميت بالتاكيد

كان لازم يعرف 3 حاجات :) اخرهم انها مستحيل تحبه !
اذاً يكفيه ان يعرف انها مستحيل تحبه ولا داعى لان يعرف غير ذلك

"مثلث ضغير"
بتاكيد الانتقال الى العالم الاخر لايعنى ان تكون هى النهاية بل لعلها تكون بداية جديدة
اذا جمع الحب بين انسان وانسان فلموت اهون من ان يفرق بينهم
وقديماُ قالو
اذا كانت ذكراك فى عينى ومثواك فى قلبى فقولى اين تغيب !
تحية عطرة

دعاء العطار يقول...

"بس لما حست انها بقت في ايده "عروسة ماريونيت"

تراجعت عن قرارها وقررت تكون نفسها
"

انا مش مع اننا نكون كوبى من حد

نعمل اللى هو عاوزه عشان بنحبه لان هيجى يوم ومش هنلاقى نفسنا

:::::::::::::

" كان لازم يعرف 3 حاجات قبل ما يحبها

انها غير أي بنت عرفها قبل كده

ان كرامتها فوق أي حد

وإنها مستحيل في يوم من الأيام تحبه"


دى مشكلة المميزين فى الارض او يعنى المختلفين

بس للاسف مش بيلاقوا حد يفهمهم لانهم مش زى اى حد

::::::::::

" ولما تكبر حبة فهميها إن الموت حاجة بسيطة

بالنسبة للحب الكبير اللي بيربطنا في مثلث صغير
"

ناس كتييييير عايشه جوانا لكن ميته

وناس كتيييير ميته جوانا مع انها عايشه

كالعاااااده متميزه يارودى

(:

ريحانة الاسلام يقول...

ولما ترجعلك حافظة سورة الفاتحة

قوليلها تقراهالي كل يوم قبل ما تنام

ولما تكبر حبة فهميها إن الموت حاجة

بسيطة بالنسبة للحب الكبير اللي

بيربطنا في مثلث صغير
....
مش عارفة اقول ايه بس كلامك
فى الجون..
تنهيييدة...

ranim يقول...

رودي
رودي
رودي
انتي رهيبة بجد تحفة موت والله
بصي كلها تحفه تحفة اوي
ما شاء الله عليكي يا قلبي
ربنا يحفظك علي طول
وبجد يا رودي بتمنالك كل خير
وبحبك اوي
وقولك استمري كده علي طول
كتباتك ممتازة

طالبة مقهورة ..درجة أولى يقول...

ميرسي يا جماعة ليكوا كلكوا :)

منورين وبعتذر عن عدم التعليق على واحد واحد بس المذاكرة كتير اليومين دول