24.11.10

شراب أزرق..ضد الوحدة



وقوفها في منتصف الغرفة أمام تلك الكومة الهائلة من الملابس 

 جعله يحتار عما يجب ان يفعله..هل عليه أن يقفز بداخل تلك الكومة ويفاجئها بابتسامة

أم ينتظر حتى تنتهي ويعد لها كوب من الكاكاو الساخن

وعندها شعرت بوقوفه وباغتته بالتفاتها إليه بعينين دامعتين :

-بردانة و مش لاقية فردة الشراب الأزرق..

فابتسم إليها ابتسامة حانية قائلاً:

-تدفعي كام وآجي أدور معاكي.؟

-مش ههون عليك تسيب رجليا متلجة وانت رجليك دفيانين.. ولا ايه؟؟

-امممممم..طيب موافق بس بشرط ، ديه آخر مرة تضيعي فيها شرابك وأنا مش موجود ..تحافظي على شراباتك وانا مش هنا 

عشان تضمني انك طول ما انتي بتضيعي شراباتك.. طول ما هكون هنا وادور عليهم معاكي.

.............. 

وفي الآخر لقوا الشراب ولو كانت هي اتعلمت حاجة مهمة..

فهي إن الشراب لما فردته بتضيع

عمر ما الشخص نفسه بيقدر يلاقيها 

بس بيحتاج حد تاني معاه وهيلاقوها سوا..

الوحدة مش دايما بتبقى كويسة واحنا مجروحين..

أو فردة شرابنا اللي بلوننا المفضل ضاعت

..................



عمرك حسيت انك تعبان اوي ومكسور من جوا لأجزاء كتير
بسبب مليون حاجة..

لما حسيت كده ساعتها كنت محتاجاك اوي..مش انت بالتحديد بس أي حد يمسكني من ايدي وميسيبنيش

أصل أنا مقلتلكش إن أنا بكره أبقى لوحدي وأنا مكسرة من جوا

وعشان كده لما قلتلي هوصلك البيت معترضتش...حقيقي كنت محتاجاك تفضل ساندني

لما بنكون مجروحين بصوت واطي كده بنحتاج أي حد معانا..
أي حد يقدر يعدينا الشارع
ويطبطب علينا لما عنينا تدمع من كتر الألم عشان نقدر نتماسك ..

مش بنحتاج كلام قد ما بنحتاج أفعــــــــال

شكرا عشان كنت معايا ومسبتنيش اقف لوحدي 
شكراً عشان حسستني إنك مش زي كل البشر
لأن في اللحظة ديه أنا كنت بكرههم اوي

..........

اهداء خاص لسخصيتين
اللي جت وصلتني البيت الصبح، واللي ساعدتني الاقي الشراب بتاعي

ملحوظة سخصية: دمي بقى تقيل اووووووووووووي وده من ايه معرفش :)
يمكن مش بعرف اضحك زي زمان بس ببتسم حلو اوي
اهو بمشي حالي لحد ما حس الفكاهة يرجع
 
يللا فوتكم بالعافية

هناك 14 تعليقًا:

Unique يقول...

:)
ربنا يديم الابتسامة

WINNER يقول...



أحيانـاً بحسدك يا رضوى انتي و أمثالك من (الأطفال):)
لسة قدامكم حياة واسعة. (بتضيق مع الوقت).
الناس اللي في عمرك حاسين بـ هم و حزن و جرح مايعرفوش مصدره إيه. (لاحظت ده في ناس كتير من نفس سنك). (و يمكن لاحظت ده في نفسي لما كنت في نفس عمرك).

لكن سعيد إني عديت المرحلة اللي انتي فيها دلوقتي. لأن الحياة قدام أحلى :)

ماتفكريش كتير في الشرابات اللي بتضيع و الحاجات المتكسرة جوة.
ارسمي وش مبتسم على ورقة و علقيها قدامك على المكتب. و كل ما تشوفيها اضحكي :)

مش عارف إيه مناسبة الكلام ده مع التدوينة دي. يمكن قلب الأم :)


جايدا العزيزي يقول...

ربنايسعدكدايما يارضوى

بس كتير بشوف الم وحزن بين سطورك

انت لسه صغيرة

عجبنى تفكيرك وتحليلك

ورفضك للاستسلام

ربنا يسعدك ياوحشه وحشاااااااااانى

تحياتى

Timo.. يقول...

مش انا قلت لك يا رضوى قبل كده اني باشوفك وانت بتكبري وباحب اتابعك..؟!!
ساعات باتوقع المرحلة قبل ما تدخليها وكاني قريت بوست انت لسه مش كتبتية..

اضحكي من قلبك لان ناس كتير مش بتعرف حتى مجرد الابتسامة :)

طالبة مقهورة ..درجة أولى يقول...

يونيك

ربنا يسعدك ويسعد الجميع يارب :)

طالبة مقهورة ..درجة أولى يقول...

وينر
ههههههههههههههه في العادي هتضايق من كلمة اطفال ديه بس مش مشكلة هخليني انا الكبيرة ومش هتضايق ^_^

للاسف ديه مساوئ كونك تينيجر
بس مظنش اني ممكن اتغير اوي ف المستقبل
الله اعلم بقى :)

منور يا احمد وميرسي ع النصيحة

طالبة مقهورة ..درجة أولى يقول...

جايدا

ربنا يخليكي ليا ةلكل اللي بيحبوكي يا جايدا

حقيقي انا عارفة اني مقصرة اوي معاكي
بس برغم ده عمرك ما قصرتي

متشكرة اوي يا حبيبتي :)

طالبة مقهورة ..درجة أولى يقول...

تيمو..

ازيك بس فين :)
مش عارفة انت بتحسسني اني بكبر بجد
مع اني حاسة ان فيه تراجع فكري ونفسي اليومين دول

ميرسي ليك جدا وويارب تكون بخير

عباس ابن فرناس يقول...

رغم اللى باين من التعليقات ان سنك ضغير

لكن كلامك كبير وخصوصا انه بينم عن تجربة شخصية

الشراب لما فردته بتضيع صعب ان الشخص لوحده يقدر يلاقيها بس بيحتاج حد تانى معاه
الوحدة مش دايما بتبقى كويسة وحنا مجروحين او فردت شرابنا اللى بلونا المفضل ضاعت :) برغم انى اكيد اكبر منك فى السن لكن معتقدش انى عندى نصيحة تكون افضل من اللى قدمتيها لنفسك ! تحيةعطرة

ريحانة الاسلام يقول...

لما بنكون مجروحين بصوت واطي كده بنحتاج أي حد معانا..
أي حد يقدر يعدينا الشارعويطبطب علينا لما عنينا تدمع من كتر الألم عشان نقدر نتماسك ..
...
:)

عباس ابن فرناس يقول...

تعرفى ايه اصعب حاجة فى الدنيا انك تحسى بالم ومتبقيش عارفة ايه السبب !

عباس ابن فرناس يقول...

تقريبن لى حوالى سعتين جوة المدونة بتاعتك
تصدقى لو قولتك
انى فى السعتين دول
اتفتحت ببان جواية
كنت قافلها من زمان
عايز اقولك انى حسيت
بونس كبير من كلامك

متشكر

قول ياااارب يقول...

مدونتك جميييله والبوست هااااااااااادى وجميل اووى
وزى ماقلتى بنضيع فرده الشراب علشان نلاقى الايد اللى تتمد لينا ونلاقى الفرده التانيه
تحياتى لفكرك الجميل

ranim يقول...

رودي

عارفه الاحساس ده اوي بيحصلي كتير بس المشكلة ان غالبا ما مش بيبقي في حد يمسك ايدي وميسبهاش
ساعات او غالبا بعتمد علي نفسي ومسك ايدي اليمين بيدي الشمال علشان احس اني موجودة معايا واني عمري ما هبقي لوحدي
يمكن ده يخفف احساسي بالوحدة بس عمره ما بيخليه يروح

بجد بتوصلي المعني بطريقة تحفة
رودي علي فكرة انتي انسانة مش هتتكرري اكيد
بجد بجد انتي تحفه
حبك بجد