19.11.10

اليوم..خلص!!!


الحقيقة غالبا مش بتكون زي الصور اللي بنرسمها

مش شرط الشجر دايما يبقى أخضر
ولا السما يكون لونها أزرق
والبحر مش دايما هادي
والغربان مش بتصاحب العصافير
والناس مش كلهم طيبين

الحقيقة بتفرق

سعات بتكون أسوأ
أكيد هي دايماً بتكون أسوأ



بس الصور بتفكرنا أن ممكن
في( يوم )
من الــ365 يوم اللي في السنة

الشمس تطلع وهي بتضحك..
والسما تكون صافية
والفراشات الصغيرة تكبر
والناس كلها تبتسم

ومش بعيد اليوم ده
الملايكة تهدينا أجنحة شفافة للطيران

بس متنسوش ساعتها إن ده كله
لمدة يوم واحد وبس :)



.............

note to self:

كتبت البتاعة ديه على الموبايل وانا راجعة من ماكدو
بعد ما سبت رغرغ وجيجي ولولو..
بالمناسبة كانوا ساعتين حلوين يارب يتكرروا


وخبر غلس للجميع..انا قررت اكتب تاني
:)
بلا شروط ولا التزامات

شكرا للــ 3 اللي قالولي اكتب عشان مستنيين اللي هكتبه
وكمان شكرا للي عيدوا عليا
وانا قصرت مع الكل عشان كنت تعبانة حبة ومدخلتش

اممممممممم باختصار

كل سنة وانتوا طيبين على طول


هناك 12 تعليقًا:

•βЯξαҜ• يقول...

وليـه يوم وآحد بس ؟؟ :D

متبقـآش بخيل بقى ياحزومبل :))

كل سنه وانتي طيبه ..

وحمدلله عالسلآمه :)

طالبة مقهورة ..درجة أولى يقول...

•βЯξαҜ•

على ما اظن حباية بنادول سابقا :)

هوا يوم كفايا عشان لو اتعودنا هتبقى حاجة مملة

الله يسلمك يا بنوتة

R-H-S يقول...

ليه الكآبة دي يوم واحد بس ليه ؟

قل لمن يحمل هما بأن همه لن يدوم***فكما تفنى السعادة هكذا تفنى الهموم

كل سنه وانتي طييبة ياحاجه روضه ويخلصك علي خير ويسترها معاكي
ويعافيكي من الامراض ويشفيكي من ال.....الايه؟

تحياتي

طالبة مقهورة ..درجة أولى يقول...

استاذ مونبه

:)
كل سنة وانت طيب
مش كآبة بالعكس
زي ما قلت ف الكومينت الاولاني ان الميزة انه يوم عشان نستناه ونعيش على امل اليوم ده ويفضل مميز

امين يارب ادعيلي ربنا يشفيني احسن خلاص زهقت بقى ..الحمد لله على كل شيء

نورت

ranim يقول...

روحي انتي
كل سنة وانتي طيبة طبعا
حلو حلو اوووووووووووووي
عارفه حتي ولو يوم اليوم ده هيبقي حلو اوي وممكن يكفينا العمر كله عارفه ان الصورة اللي بنرسمها بتبقي مثالية اووووي بس صدقييني في ايام كتير بتبقي زي الصورة اللي رسمنها له

بحبك يا رودي
انا مبسوطة اوي
تحياتي يا قمرررررررررري

دعاء العطار يقول...

فرحانه اوووووى انك رجع تكتبى

لان كانت وحشانى كتاباتك (:

....

اولاً الصوره بتاعة البوست عجبانى اووووى

اما البوست

ففعلاً مش كل حاجه بنرسمها بنلاقى زيها

ولا كل حاجه بنكتبها بتعبر عن الواقع اللى عايشينه

فيه حاجات بنتمنى تكون موجوده لكن فى الحقيقه مش بنلاقيها فبتفضل فى خيالنا مجرد صوره جميله

لان اللى بنعيشه حاجه .. واللى بنتمناه حاجه تانيه خالص

ربنا يفرحك دايماً يارودى ويجعل ايامك كلها سعاده لانك تستاهلى كلللل خير

(: (:

Days and Nights يقول...

كل عام وأنتى بالف خير ... مدونة صادقة ... سعدت بما فيها ... أدعوك لزيارة مدونتى ... ودمتى بكل ا لحب

WINNER يقول...



الدنيا فيها أوقات رائعة.

يا رب تلاقي منها كتير.

:)

اقدم عاصمه فى الحب يقول...

السلام عليكم

كل سنه وانتى طيبه
.
بصى بقه
انا ميت من الضحك بسبب واحد صاحبى قاعد جنبى
بيقولى انت عيل فقرى لو اليوم ده جه هنلاقيك نايم كالعاده
.
اممممم
حمد الله على السلامه
وانا كمان حابب انك بتكتبى علشان إستمتاعى بكتابتك
ودى وإحترامى :)

جايدا العزيزي يقول...

رضوى

وحشانى يامجرمه

ههههههههههههه

اتعودت عليك

كل كلمه هزتنى لانها من الواقع

صح البحر مش دايما هادى

والشجر ليس دائما اوراقه خضراء

كذلك البشر غاليتى

موضوع فى الصميم

تسلم افكارك

تحياتى

عباس ابن فرناس يقول...

مش شرط ومش ضرورى انها تكون زى الصورة اللى بنرسمها
بس المهم اننا نتقبلها
وده اكيد هيكون صعب جدا

رغم ذلك الحقيقة فى كل الحالات بتكون هى الاجمل
لانها وببساطة هى الحقيقة !

على فكرة
اليوم اللى الشمس بتطلع فيه وهى بتضحك

مش مهم برضو يكون يوم فى السنة ههههه
او حتى كل عشر سنين
المهم يكون جى

ريحانة الاسلام يقول...

انا عايشة بقالى 16 سنة مستنية اليوم ده
ولسة عندى امل وثقة انه جاى ان شاء الله
وساعتها هطير واجيلك
واخطفك و.....بس