ان شاء الله

شروط التعليق في البوست ده بما انه مجرد فضفضة شخصية :

1-محدش مضطر يعلق وخصوصا التعليقات اللي بتسبب ارتفاع ضغط الدم.
2-محدش يقولي مالك هيكون ردي واحد ملكش دعوة.
3-مش هتناقش ف حرف واحد م اللي هكتبه هنا بره البلوج.

مكنتش فاهمة ليه لما قلتلك حاضر..قلتلي قولي ان شاء الله

اقولك بجد.. انا كنت فاهمة بس مكنتش حاساها اوي غير لما جربتها
أنا كويسة عشان ديه إرادة ربنا مش عشان أنا باخد بالي من نفسي

هوا اللي بياخد باله مني ..زي ما أنا واثقة إنه بياخد باله منك
بس باخد بالاسباب اهو..

وحاسة إني كده أحسن كتير لما بدأت اسمع الكلام
وآخد أدويتي وبقيت بنام بدري(نسبياً عشان الكدب)
واتصور إني بقيت أشرب لبن ..مشروب الاكتئاب المفضل عندي :)

..........

اكتشفت
اني مش بكره القمر اوي زي ما كنت فاكرة الفترة اللي فاتت
.. هوا بس بيرتبط باختلاجاتي

لما بيكون بيسعى للكمال في بداية الشهر..بكون في قمة التألق نفسياً

وفي نصه بتكون عندي حالة لا شعورية

أما في بداية التراجع بتاعه تاني..بحس أسوأ احاسيس

ده مش دايما بس ف خلال الكام شهر دول ركزت ف الموضوع

.............

هسااااااااااافر اخيرا ..الخبر ده اللي حسسني بانضغاط معامل مرونتي (تعبير فيزيائي بحت)
محتاجة اوي اسافر برغم اني هبوظ اسبوع السفر عشان الدروس

وبرغم اني مش قادرة اصبر اسبوعين كمان

ويمكن عندي هاجس بيقولي ان هيحصل حاجة
في شغل بابا هتخلي الرحلة تتكنسل كعادة اخر مرتين

الخبر ده ضايقني او فرحني مفهمتش بالظبط احساس معقد

.......


مجرد التفكير في كم التصرفات اللي كنت ممكن اعملها معاها في لحظة جنون

بيحسسني بمتعة عشان كان نفسي ارد عليها اقولها وانتي مالك بعلو صوتي
يوميها المشكلة اني اصلا مكنتش برد بس هيا استمرت في كلامها

كأني مستمتعة وكل ما حد يقطع كلامها ترجع تبدأ من جديد
كان البرج اللي فاضلي هيطير بسببها..وهيا بتديني جرعة حقد نقية..

بس متعرفش اني فاهماها كويس اوووووووي

ومش لازم اتفاعل معاها عشان اقول انها شخصية حقييييييرة

وللعلم فقط

انتي متفرقيش معايا ف أي حاجة يدوبك شغلتيلي عقلي بدل ما كان واقف
ابقي فكريني اشكرك المرة الجاية اللي هشوفك فيها

ومن المرة اللي بعدها هعمل نفسي ولا أكني اعرفك....

........

مش بكره تقلباتي..الحقيقة انا مش بكرهني
بكره ان الناس بتكره اني متقلبة
وبما اني حاليا مش بهتم غير بعدد قليل
ف..مش مهم

.....

كنت بحلم بالأغنية ديه مع اني مسمعتهاش قبل كده
عارفة عنوانها بس


لما الشتا يدق البيبان
لما تناديني الذكريات
لما المطر يغسل شوارعنا القديمة والحارات
ألقاني جايلك فوق شفايفي بسمتي
كل الدروب التايهة تنده خطوتي
كل الليالي اللي في قمرها قلبي بات
مش جاي ألومك عاللي فات
ولاجاي أصحي الذكريات
لكني بأحتجلك ساعات
لما الشتا يدق البيبان


والشتا بيدق البيبان دلوقتي بتوقيت رغبتي في تغير المواسم

..
تصبحي على خير..يا رضوى
ومش بلومك صدقيني انا بس محتاجاكي اوي