2.10.10

ابيض واسود



أُبَ عْ ثِ رُ 


أَوْرَاقَي بِفَوْضَى


وَأَسْتَلُّ مَا أَشَاءُ


مِنْ جِرَاحِي


لأُعَمِّدَ الذَّاكِرَة


بِحنان حُضُورِكَ


الْمُقَدَّس*


:)

افتكرتك وضحكت
ضحكت اوي
عشان وحشتني اوي

ليه الافتقاد شعور وحش وبيوجع ما انا ممكن اخليه حاجة تفرحني
فتحت الصور ودخلت على فولدرك..بقالي كتير مشوفتوش..كنت خايفة منه

ابيض واسود..بقى فيه حد يختار الابيض والاسود بس؟
اتصور انها شبهك اوي
الوان صارمة وعارفة هيا عاوزة ايه..محددة موقفها
الوان الموت
عشان كده عمري ما حبيت الابيض ولا ارتحت للأسود

طب فاكر حكاية الصور ديه..وميدو قال ايه عليها ههههههههههههه
مظنش انك نسيت بس انا افتكرت وقولت افكرك

انا بحاول اخد بالي من نفسي..عشانك والله بس
حتى لو كنت مش بتاعي وحتى لو كانت خطوطنا هتمشي متوازية
يعني عمرنا ما هنتلاقى

حتى لو كنت حلم بعيد في ليلة 14

او موجة سرحانة غلط في بحر مياهه راكدة

هتفضل برضه السبب اللي عشانه بحاول احارب
مش عاوزة استسلم عشان مفيش حد هيشيلني لو استسلمت دلوقتي

أًصل الشخص الذكي اللي بيختار انسب الاوقات عشان
يستسلم فيها لما يثق ان فيه حد هيسنده لو وقع

هل ده معناه اني ذكية؟؟؟

تؤ بس معناه اني لسه بتعلم وباخد مقالب كالعادة
بتنرفز وبيجيلي حالات فزع وبقعد احكي مع الحيطة وكل حاجة عادي يعني


اي نعم انا اوقات بحس اني متكسرة حتت صغنتوتة بس بعيش تاني
سبحان الله ربنا خلقلنا قدرة على العلاج بدون اي تدخل مننا

مش عارفة انا ليه ببعد الناس عني حتى الان..
مش قابلة اثق في حد تاني ..فيه حواجز كتيييير بين الناس وبيني
مش عاوزة اشيلهم دلوقتي..مش مستعدة
وبما ان خطوتي بسنة وقرار اليوم باخده في 100 يوم
فمش هستعجل..اصل انا كده ومش عارفة اغيرني فهتماشى مع الوضع 

اسوأ حاجة بقى حصلتلي الفترة ديه اني فكرت اثق في الناس من تاني
والصدف اثبتتلي استحالة اخد الخطوة ديه 

بس لما اكتشفت اني مش مضطرة اثق ارتحت اوي بشكل غريب

نفسي في دكتور نفساني يحللي التصرفات العجيبة ديه
ويديني اسباب مش عارفة اديها لنفسي

نفسي افهمني اوي والله..بس تعرف هتبقى لعبة مملة لو فهمتني
خليني كده بكتشف عني كل يوم حاجة جديدة مع وجود 3 ثوابت

1-لسه واحشني بس بحب مش بوجع :)

2-لسه ببعد الناس عني..
(باستثناء بسيط للقاعدة ديه)

3-لسه مش قادرة اثق في حد
(عشان عارفة انه هيخذلني وهتجرح اوي)

وحاجة اخيرة انا لسه بدعيلك بس مش بقول لحد ..
..........

*شعر لريتا عودة


.....