مبدئيا الكومينتس مقفولة في البوست ده والكام بوست الجايين لضيق وقتي ولحد ما انظم حياتي وظروفي الجديدة
مش بتابع برضه اي حد حاليا..لنفس الظروف بالاضافة لظروف نفسية..
...............
"الاسئلة غالبا خدعة ، أي كذبة مهذبة
تستدرج الاخرين إلى كذبة أكبر"
طب انا مبعرفش اكدب عليك..انت بالذات مبقدرش
بقولك الحقيقة واللي حاساه
مهما كان ملخبط ومهما كان بيوجع..مهما حصل كنت بقوله
حتى لما كنت بكذب لأي سبب .. كنت بجيلك واختار وقت
تكون فيه رايق بعدها اعترفلك
زي الاطفال الصغيرين لما بيعملوا مصيبة ..ويصرحوا بيها
وانت كنت بتسامح فمكنش فيه داعي للكدب
..........
"الاسئلة البديهية التي نجيبها بتلقائية ما هي سوى محض..كذب
نجيب من سألنا بغرض النفاق..بنفاقنا الخاص"
لأنه مجرد سؤال عابر من حد غريب..واجب عليهم يسألوه
لكن مش هيهتموا بالاجابة عليه تبقى ازاي..
طب ده مفسرش لما انت سألتني ازيك وفاجئتني..ليه معرفتش اجاوب ؟؟
اقولك انا الحقيقة بجد
عشان مكنتش عارفة هو سؤال ناتج عن احساس بالذنب؟
ولا بتتلاعب بالكلمات وتقصد عاملة ايه..من غيري؟؟
وعشان انت مش من الناس الغريبة..
فعمري ما كنت هرد اقول الحمد لله كله تمام
عشان مش كله تمام
انا مش تمام
بس متخفش عليا..انا اقتنعت باني لازم اكتئب واخف بعدها
وانا اللي هكتب لنفسي الروشتة وهاخد الدوا بايدي
"لأن الحزن قضية شخصية..يمكن أن تصبح أحيانا قضية وطنية"
هعالج صداعي وذكرياتي ونفسي....بنفسي
وهبقى...كويسة ان شاء الله
...
مش مهم انا بقى...كنت مجهزة ليك كلام كتير
وفيه حوالي 4 بوستات في الدرافتس ليك منزلتهمش..
مش وقت اعترافات ولا اسئلة واجابات انا تعبت من الكلام وقررت
"ارتداء معطف الصمت"
..................
واخيرا
اهداء مش انا اللي كاتباه بس لحظة ما قريتها قولت ده... انت
لأنّكَ وحيدٌ
و روحُكَ شاحبةٌ
تلوّنُ وجوهَ أطفالِكَ بالمساحيق
ثمّ تجلسُ قبالتَهُمْ
.و تبكي
-سوزان عليوان-
