كبرت اوي

بوست تدويني سخصي مش اكتر..وليس الغرض منه اي حاجة ادبية (يعتبر قرص مهديء نفسيا)
نو كومينتس م الاول :)
............

انت كبرت اوي
تعرف عدى اد ايه ومشوفتكش؟؟فاكر زيي كده ولا انا اللي مش بنسى وجعي؟؟
اخر مرة فعلياً اتكلمنا فيها كتير وفضلنا نضحك بشكل هستيري
لما كنت بتعملي ايميل المدرسة
فاكرها ديه ؟؟ كانت عشان اخد الكورس مع
oracle academy

وطبيعي بعدها اتقابلنا مرة او اتنين ف افراح
بس مكناش بنتكلم
مجرد سلام..بارد..بيجرحني اكتر ما بيداويني


كبرت اووووي طول الفترة ديه
بقيت ابو ياسين مش عمرو اللي كنت بلعب معاه
أول حد علمني ازاي اوصل نت بخط الفون
مش عمرو اللي شوفته وهوا بيذاكر في الليسانس
وبسأله بسذاجة طفلة عندها 9 سنين
عمرك لقيت هيكل ديناصور كبيييييير زي اللي ف التليفزيون؟؟

ولا كنت عمو اللي كان بياخدني نادي الزمالك وبيلعب معايا كرة طايرة
بقيت فجأة ((ابو ياسين)) ...اسمه جميل اوي قلتلك كده في السبوع بتاعه
وقلتلي انك حلمت بتسميته كده


كنت زعلانة منك زمان
وكتبت عنك كتير هنا بدون ما اذكر اسمك بقوة زي دلوقتي
قولت بكرهك..بس اكتشفت اني بحبك اوي
عشان كده لما تجاهلتني وحطتني وسط مشاكل الكبار
اتغظت واتنرفزت...وقلتلك بكرهك
(بتوجعني الكلمة ديه اكتر ما بتوجع اللي بقولهاله دايما وعمري ما عنيتها
لأن ببساطة اللي بكرهه بطرده من حياتي مبحبش اناقشه)


انا متوقعتش اشوفك النهارده وكنت خايفة من زمان م المقابلة ديه
..ولما عمتو قالتلي انك جاي وكمان مع ياسين قلت هستناك
و عشان اكسر لحظات الانتظار ..فضلت ارسم واشخبط وافكر
لحد ما نمت على الكنبة والألوان بوظت التي -شيرت :)


مش قادرة اوصفلك انت كنت واحشني ازاي..
اكتر ما انا كنت واحشاك بس معرفتش اقولك ده
أما ياسين باشا بقى ده قصة تانية
لأنه ببساطة بيجسد مرحلة حرماني منك
الوقت اللي مكنتش فيه معانا كنت معاه هوا
انا حبيته من قبل ما اشوفه كبير كده
من صورته اللي بعتهالي زمان
بس شكله اتغير...


4 سنين فاتوا !!!!!!! انت متخيل
انا كمان كبرت حسيت اني كبرت وانت بتكلمني
وبرد عليك وبتقولي احييكي على تفكيرك
واحييكي ع اللي بتعمليه والزيارات ودور الايتام والمستشفيات
كان نفسي انا اللي احييك لما قعدت تحكيلي
عن مستشفى مجدي يعقوب وقد ايه جبااااارة
وعلى مستشفى 500500 وقد ايه هتبقى احسن كمان من 57357

ساعتها حسيت بالذنب شوية ومصدمتكش
كنت هتتصدم لو قلتلك مش عاوزة اكمل ف اللي بعمله
بتلكك ب بابايا لما قالي ركزي في المذاكرة
مع اني لو عاوزة اكمل ف الاتنين هكمل
بمشي بدماغي انا.. زي ما كنت بتقولي زمان :)
اصل حقيقي حسيت اني فشلت اوي..وانهياري امبارح بالليل مكنش مبرر
وتظاهري بأني هعدي اليوم بأي شكل ولو حتى وحش
بوظ اليوم..وانا شايلة المسئولية كاملة


كل ده خلاني مكنتش مبسوطة كليا فيه حجات كتير كانت عاملالي ربكة
لوهلة حسيت اني ممكن احكيلك..ولوهلة تانية شكيت ورفضت الفكرة


اما ياسين ده حكاااااية..
معجبة اوي بطريقة تربيتك ليه واما قلتلك كده فضلت تفهمني
بس اكيد فكرة انك تكلم طفل عنده 4 سنين وتفهمه غلطه..
وانه يخضعلك ويسمع كلامك..!!خرافية..صح اوي
هيطلع عنيد جدا لعلمك
بيخاف من الكتاكيت ومش بيعرف ينطق اسمهم اساسا
بتقول عليها عصفورة..خلاص نمشيها عصفورة
كلهم من فصيلة الطيور..ولا يهمك يا ياسو
ياسلام عليك يا ياسو وانت بتديني نضارة الشمس بتاعتك
الساعة 10 بالليل !!!
وكنت هتجنن واقبل دعوتك وانت بتقولي تعالي معانا ع القهوة
نسيت اقولك ميرثي..
مما يجعلني حد قليل الزوق وممكن يؤدي لانحرافك يوما ما ^_^

انا مش مظبوطة خالص..مش عارفة لما شوفتك
كان المفروض اهدى ولا ازيد توتر
الكبار دول اغبيا اوي..بينسوا ان الوقت بيعدي والمفروض نكبر
وعقلنا يكبر معانا ونسامح بقى
مبيسامحوش ابدا..

مرة اخيرة بقى
انت كبرت بجد يعني وبقيت 31 سنة بحااااالهم
وعشان كنت متغاظة ومجبتلكش هدية من اسبوع ولا كلمتك
فــ كل سنة وانت بتكبر يا ابو ياسين :)

...................
*ملحوظة: تم قفل الموبايل واخد هدنة طويييييييلة حبة..مش هعرف اتعامل مع حد وانا ملخبطة ومرتبكة ودماغي فيها مليار فكرة..وبكل تأكيد مفيش ايميل واحتمال مفيش فيس بالمرة (هقضيها مذاكرة وهاوس مع انهم مضرين
بالصحة لو اجتمعوا مع بعض)

*محتاجة اعتذر جامد لناس كتير..بس مش ف المود المناسب لأي جدالات مثيرة للاعصاب مش هقدر اتوقع ردود افعالي فهأأجل الموضوع ده يومين كده.

*حاجة جديدة اوي عني: انا مش عنيدة زي م كنت فاكرة..بدليل اني باخد آراء الناس وبدليل اني برجع ف كلامي لو لقيت حد اقنعني برأيه صح..

*آخر حاجتين خالص اهم بقى
رجلي وجعاني اووووووووي وجالي كرامب اذ فجأة كده وانا بكتب
وعاوزة انام بشكل رهيب بس حاسة بالذنب وبعاقب نفسي فيما يسمى بجلد الذات وبصراحة بقى انا استاهل
..