20.8.10

مسكون بالفوضى ولكن لا اسكنها بالضرورة



سيبني من كل الكلام وهقول بس اللي حاساه
مش عارفة اتصرف وحاسة ببلادة
يمكن عشان مش قادرة اتنفس
صعوبة التنفس قللت وصول الاكسجين للعقل
وبالتالي بقيت مش عارفة اتكلم
ولا افكر ومش قادرة اكلم حد


معملتش حاجة ف اليوم..منمتش كويس
من التوتر اللي حاساه
وقايمة عندي صداع نصفي

الجو مش لطيف خالص ومش مشجع
ولا على المذاكرة ولا الراحة النفسية
هوا يعني ايه صحيح راحة نفسية ديه؟؟
بقالي كتير محستهاش

..
روقت المكتب امبارح
بكره ترويق المكتب عشان حاجة واحدة بس
اني هلاقي حاجات قديمة في ورق مرمي مكتوب
الحجات ديه هتصحي حجات تانية جوايا
واما الحجات ديه تقوم هتعمل لخبطة الجديد بالقديم
وهبقى فوضوية

يعني ارتب الفوضى اللي برا
الاقي فوضى جديدة جوايا

فيه حد قال(مش فاكراه)
"أنا مسكون بالفوضى ولكن لا اسكنها بالضرورة"
انا كده..بروق اللي برا عشان اداري ع اللي جوايا


هوا انا ليه بقيت كده..كل ما بقعد لوحدي..بحس بخواء
اني مش قادرة ارتب حياتي ومحتاجة اروح مركز اعادة تأهيل

عشان مش عارفة اتعامل مع الناس..مش عارفة اتعامل صح

حاسة ان كل حاجة فيا غلط
افكاري وقناعاتي..كلها محتاجة تتغير
مبادئي واساليبي عاوزة تتباع لبتاع الروبابيكيا
كلللللللللل حاجة مش صح

....

يارب انا تعبانة بجد..
انا كلي على بعضي ذنوب
مش قادرة احقق هدف خلقي
ومش قادرة ابقى حد كويس

تعرف انا عارفة انك عارف اني خايفة اوي دلوقتي ومتوترة جدا
وبقول اي كلام عشان اهدى وخلاص

يارب..بخاف اوي
بخاف ادعي وانا بصلي التراويح وسط الناس
بخاف صوتي يكون واطي ومتسمعش

بخاف دموعي تكون خوف على نفسي مش خوف منك
بخاف يارب اعيش وانت مش راضي عني

مش حاسة بطعم للدنيا ومبقتش اكلمك زي زمان
مببصش من شباكي عشان حاسة ان كل حاجة اتغيرت
حتى اوضتي مبقتش اوضتي
برغم كده عارفة انك معايا

وعارفة انك بتحبني
وعارفة انك حتى لما خليتني اعيا من يومين
ورجلي كان وجعاني بغباء ومش قادرة اقف
عشان كنت عاوزة تريحني يومين لأني مش بريح نفسي

طول عمري كنت بدعيك بدعاء واحد وانا مخنوقة
ولما احس اني وحشة اوي
" لقد ضعفت ولا غيرك يقويني لقد يئست ولم أفقد فيك "

يارب انا عارفة اني وحشة ..ومش فاهماني
بس انت فاهمني
ساعدني يارب

..


ملحوظة:هسيب الكومينتس بس غالبا مش هرد عليها
واحتمال اصلا انزل بوست كمان شوية بالليل او بكرة معرفش

ملحوظة 2:الصورة اللي فوق بتدل ع الفوضى
واللخبطة اللي جوايا مش اي معنى تاني..

هناك 5 تعليقات:

Mahmood البطراوى يقول...

عارفه الحاله دى احسن حل ليها انك تشتتى تفكيرك بالتركيز على حاجه واحده صغيره مش كبيره ساعتها هتحسى ان توترك كله منصب عليها ودا بيريح احيانا
صدقينى يتنجح احيانا

انا مره زمان كتبت بوست عن الموضوع دا شوفيه يمكن الفكره تنفعك http://batoot-haboob.blogspot.com/2010/04/blog-post_19.html

وملحوظه بقى فى الاخر

عن أبي موسى الاشعرى قال : كنا مع النبي صلى الله عليه وسلم في سفر فجعل الناس يجهرون بالتكبير ، فقال النبي صلى الله عليه وسلم : اربعوا على أنفسكم فإنكم لا تدعون أصم ولا غائبا ، إنكم تدعونه سميعا قريبا وهو معكم .

دمتى بود

Ramy يقول...

الحالة دى عندنا كلنا

متخفيش ربنا زى ما انتى قولتى بالظبط عارف قلبك بيحبه أزاى

ثقتك فى ربنا هتعديكى

(:

و ميهمش لو مرضتيش هنتقمص بس (:(:
مش هنزعل

ربنا معاكى دايما

رمضااان كرييييم (:

دعاء العطار يقول...

ربنا يريح قلبك يااااارب

ع فكره انا كمان زيك مش بعرف ادعى وانا فى وسط التراويح بالرغم من يقينى ان اكيد ربنا سامعنى

بس مااعرفش ليه انا كده

ساعات كتيييييييير بحس انى مش فاهمه نفسى ولا عارفه انا عايزه ايه زيك بالظبط

ربنا يوفقنا لما يحبه ويرضاااه

R-H-S يقول...

ربنا يشفيكي ويهديكي

Heidenröslein يقول...

عارفة ..

برغم اني معرفتش مدونتك غير من يومين بس

بس اول مرة احس اني لاقية كلام جوايا كان عاوز يطلع من زمان ومش راضي

مكتبي برده عاوز يترتب بس كل مرة بحس نفس الإحساس .. ان كل حاجة فى حياتي لازم فعلا تترتب .. محتاجة اعادة تأهيل .

نفس الكلام اللى نفسي أقوله فعلا ..
مكنتش ناوية اعمل كومنت لحد قبل ماخد فكرة عن المدونة الأول بس الكلام شدني جدااااااااا ..

تحياتي :)