كفاية جري!!

-تعرف ان اصعب حاجة التعامل مع البشر

كل واحد عاوزك بطريقته..بمزاجه..مش عاوزك كده عشان انت كده

تراجيديا بشرية..انك تخلي اللي قدامك على مزاجك

معرفش ليه محدش تقبلني زي ما انا بالظبط غيرك

سبتني بحريتي و اول ما ابدأ اميل عن كوني انا ..ترنلي جرس الانذار

تقولي ستوب..ده مش انتي



-انا حاسة اني بقالي كتير بجري

جريت حوالي 3 ميل وطول ما انا ماشية اشيل قوالب طوب

طوبة فوقيها طوبة وراها التانية

لحد ما تعبت...ورجلي مش قادرة تشيلني

الشمس سخنة اوي والطريق طلع طويل بس مفيش سبيل للتراجع

نفسي حد يندهلي وانا بجري ويقولي بسسسسسس

اهمدي شوية..بطلي اللي بتعمليه ف نفسك ده

انا مش بشتكي..

بفضفض عشان حبة طوب يقعوا من على كتفي




-انت عارف ايه اصعب حاجة

ان كل حاجة في لحظة كده اتغيرت..البيت والأوضة

الناس كمان اتغيروا..وانا اتغيرت !!!!!!

انا حاسة ان خلاص هبقى لوحدي على طول ..

مش هتظاهر او اكدب عشان مبعرفش اكدب ف مشاعري

انا خايفة من كده عشان مبحبش الوحدة


بس ساعتها هفتكرك برضه لما اعمل مكرونة معجنة

او بطاطس محروقة!!

او اسأل نفسي سؤال فلسفي عبيط من اسئلتي

اللي بطلت اسألها لحد

ممكن أكون مسجونة بذكريات..

بس يمكن عشان بتخليني ابتسم في اوحش الاوقات

أو يمكن عشان الحاضر مرهق أوي..تاعبني جدا..ومش عاوزة اقبله


-بجد انت احسن مني أوي..عشان مش راضي تسيبني مع اني مشيت!!

وانت كمان مشيت بس لسه بتسندني في كل خطوة

وبتسمعني كويس زي زمان بالظبط

_________