24.5.10

ميثاق أبدي..




متستغربش!!

لما تلاقيني بضحك أوي على نكتة بايخة انت قولتهالي

أو بعيط بجنون على طفل مش عارف يعدي الشارع

أو متعكننة بسبب مشهد شوفته في فلم


أوعى تضايق لما تلاقيني قاعده هادية اوي

وانت عمال بتكلمني وانا مش ببص لعنيك

عشان متكشفش اللي جوايا



اعرف ساعتها إني بس مجروحة من جوه

ومحتجالك أوي.. بطريقتي الخاصة





متزعلقيش لما أقولك عاوزة اخرج في نص الليل

متقوليش الوقت اتأخر ..

خدني من ايديا ومتسبنيش لوحدي



ولما أتوتر اوعدني انك هطمني..

وهتحضني لحد ما ابطل اترعش

وترجعلي ثقتي في نفسي..



يعني باختصار
اتحمل..

غيرتي وأنانيتي

صمتي ودوشتي

لحظات غبائي وعبقريتي

أصل هوا انا كده..

تركيبتي معقدة


ساعتها بس هقدر اثق فيك

واسلمك مفتاحي للأبد




***********
بره الموضوع كده على جمب..


كل سنة وانتي طيبة يا دودي(دعاء العطار)
وعقبال مليون سنة وتكوني دايما بخير وسعادة
و عاوزة اقولك انك اصلا اثرتي فيا وسيبتي بصمتك عندي
يعني حققتي السنة ديه جزء ولو بسيط من حلمك

بحبك جدا يا مقطقطة :)


هناك 17 تعليقًا:

richardCatheart يقول...

هى دى النفس البشريه يا رودى
احاسيس متقلبه ساعات عند ناس بتكون اعلى من ناس تانيه
بس الاكيد ان لازم اقرب حد هو اللى يحتوى
كل دا ومن حقك عليه دا والا ماينفعش يكون اقرب حد
هو الوحيد اللى المفروض يملك حق الاحتواء وهو الوحيد اللى لازم يقوم بيها لانه هو الوحيد اللى هايستلم المفاتيح الاباديه لو يستاهل فعلا

كل سنه ودودو العطار بخير وصحه وربنا يحققلها كل احلمها يارب

ليله شتاء يقول...

هكذا الحب تحمل الحبيب كل المتناقضات اللى جوانا

ربنا يسعد أيامك

كل سنة وصديقتك بخير

دعاء العطار يقول...

عارفه ايه اللى حصلى دلوقتى ؟

عينيه دمعت وكان نفسى أحضنك أووووووووووووى

بجد بحبك اووووووووى يارودى

ودى أغلى هديه جاتلى

ربنا يخليكى ليا يااااارب

::::::::::::::::::::

هو مادام بيحبها يبقى لازم يتحملها ويحتويها حتى لو شايف ان دى تصرفات مجنونه وحتى لو مش مقتنع باللى بتعمله

عارفه مشكله البشر انهم بيتعاملوا مع الناس اللى حواليهم من منطقهم هما وعقلهم لكن مش بيحاولوا يفهموا او يحسوا باللى غيرهم بيفكر فيه او بيحسه

مهما كان اللى قدامنا شايفين ان تفكيره تافه او مش منطقى لاااااازم نحترمه ومانقللش منه أبدا

دايما كتاباتك بتمسنى جدااا

دمتى بكل خير وود

ريحانة الاسلام يقول...

انتى مش تركيبة معقدة ولا حاجة يا رودى
انتى بس من الاخر
انسانة بجد
جواكى مشاعر مختلفة واحساس عالى
ومحتاجة اللى يكون زيك
محتاجة حد يكون انسان بجد
....وحشتينى اوى
بحبك فى الله

الشـوكة الــنـاعـمـة يقول...

ايه يارضوى الجمال ده
عفوى بس عميق اوى
انا ناويه اقتبسه
ههههههههههه
ربنا يسعدك يارب
طمنتينى عليكى انا كنت قلقانه عشانك
دمتى بخير

اقدم عاصمه فى الحب يقول...

السلام عليكم


اللهفه .. عنوان كلماتك
حسيت كلامك بجد ودخلنى بسرعه
ربنا يسعدك يا رب ولا يحرمك من كل اللى بتحبيهم :)

بــــ الخطاب ــن يقول...

على رأى أحمد أدم عارفين معنى الـ ح والـ ب عارفينه من الـ أ لـ ى
دا الشرح بتاعه بقى

وكل سنه ودعاء طيبه

طالبة مقهورة ..درجة أولى يقول...

richardCatheart

كومينتك جميل اوي يا قطتي..اصل فعلا المهم الاحتواء!! وخاصة من الاقرب

وربنا يسعدك يارب :)

طالبة مقهورة ..درجة أولى يقول...

ليلة شتاء

فعلا .. الانسان اصعب مخلوق

وانتي طيبة :)

طالبة مقهورة ..درجة أولى يقول...

دعااااااء

ملكة الحفلة

ربنا يسعدك وينصرك يا دودو وتحققي باقي حلمك الكبيييير اوي..وانا كمان احقه معاكي

تمام كلامك يا دودو

بحبك ف الله

طالبة مقهورة ..درجة أولى يقول...

ريحانة الاسلام

سيروووووز وحشاني جدا يا حبي
احبك الذي احببتني فيه

ربنا يخليكي يا سيرو وتكوني عملتي حلو ف الامتحانات..

طالبة مقهورة ..درجة أولى يقول...

الشوكة الناعمة

ربنا يخليكي يا قمري انا اللي قلقانة عليكي لوقتي ينفع كده؟؟؟ :)

اتفضلي المدونة كلها البيت بيتك ويشرفني جدا انه عجبك

طالبة مقهورة ..درجة أولى يقول...

اقدم عاصمة ف الحب


ربنا يخليك يا احمد ميرسي ع كلماتك الرقيقة ديه

طالبة مقهورة ..درجة أولى يقول...

بن الخطاب

هههههههههههه ياراااااجل كل ده ف البوست..اتصور مخدتش بالي

نورتني كالعادة

نسر الشرق يقول...

انتى طالبه ولا استاذه ده انا اللى طالب عندك على فكرة مدونتك رائعه وفكرتها جديدة وجميله بس للاسف انا بتمنى تفضلى طالبه على طول علشان نتمتع بالملخصات بتاعتك دى على العموم لو احتجتى درس خصوصى ولا حاجة انا موجود اول 100 حصه مجانا http://nisr-elsharq.blogspot.com/

4xmisr يقول...

csmag.builder-eg.com
تم انشاء مجلة متخصصة فى المجتمع المدنى ,يكتب موضوعاتها أعضاء المنتدى
ibond.builder-eg.com
أقسامها المجتمع المدنى واقتصاد و تكنولوجيا اتصالات ومعلومات
ملف العدد,صفحة كاريكاتير
كما تم انشاء دليل للبرامج المفتوحة
foss.builder-eg.com
أغراض المنتدى
تجمع للمهتمين و المتطوعين فى العمل المدنى , رسالة أورمان الخ,
الاشتراك فى مجموعة أو مجموعات المنتدى لعمل كتب , ملفات فيديو للتنزيل أو على يوتيوب
عمل مكتبة تابعة للموقع من كتب الأعضاءفى موقع خاص بعد عمل عدد لا بأس به من الكتب, شرح شامل للرخص الحرة و الملكية الفكرية, ترجمة المشاريع المفتوحة المصدر ,تبادل الخبرات بين أعضاء المنتدى,الاستثمار و المشروعات الصغيرة و العمل من المنزل ,التسوق و التجارة الاليكترونية
بالاضافة لمواقع أخرى سيتم افتتاحها بعد نجاح هذا المشروع باذن الله
وهى مواقع ذات صلة بالمصادر المفتوحة وكيفية الاستفادة منها للجمعيات و الشركات و الأفراد الخ
يسعدنا انضمامكم للموقع بكتابة مقالات فيه بالتعاون مع من سيرغب فى ذلك أيضا
ملحوظة : بالطبع يستطيع صاحب المدونة مسح التعليق , و نأسف للازعاج

طالبة مقهورة ..درجة أولى يقول...

نسر الشرق

متشكرة جدا لكلامك الرقيق ده

نورتني