1.3.10

رقصة السالســـا..

اليوم..سترتدي الأحمر..وسترقص السالسا..
لا يهم كم تكره الأحمر
أو أنها لا تعرف كيفية رقص السالسا
لكنها ..ستتحرك ..ستقفز وتتمايل بخفة
ستثور وتحطم المسرح
سيهتاج الجمهور..ويصفقون كما لم يفعلوا من قبل..
أما هي فستقف على قمة العالم
وستجعلهم يرون نظرة الرضا
وابتسامتها الساحرة..
وبهذا

سوف تشتت انتباهم عن بقايا المسرح المحطمة


* * * *


سأعد لك النسكافيه بوصفتي السحرية..مع رشة من القرفة

..لم اتعلم بعد كيف اصنعه لأجلك فقط

ادرك من نظرتك الأولى أنك تكره القرفة...

لكنك ستبتسم وتحمله ثم تتذوقه باستمتاع غريب

ولن تبالي سوى بأنني من صنعها وستحبها..كثيراً


* * * * * *


كتبت كتير النهارده..كلام ملوش معنى..
مش هينفع اكتبه هنا لسه عندي عقده عدم ثقة
من اخر صدمة خدتها ومش قادرة اتخطاها..مش عارفة احكي بجد

أو ممكن اكون خايفة اتعلق بحد تاني عشان ميتكررش اللي حصلي

مش قادرة اعبر..وبيتهيألي محدش راح يفهم
لسه حذرة وبسيب مسافات كبيرة بيني وبين الناس كلها
عندي صداع جبار..وحاولت أنام الضهر
برغم اني مش نايمة غير 4 ساعات بالليل بس معرفتش
عملت نسكافيه ..مش عاوزة اشربه
جبت اكل من بره..ومليش نفس آكل

لسه كل ما حد يشوفني يقولي كُلي وانتي بتذاكري عشان متقعيش

باخدهم ع قد عقلهم واقولهم حاضر ..يمكن اكون بهمل في صحتي

بس ده لأن فيه حجات تانية اهم

ورايا مجلة واذاعة ومسئوليات ومسابقة مهمة في آخر مارس

متوترة وعشان كده بكتب اي كلام
هوا تقريبا انا خايفة..بس بستعبط عشان مبينش

تعرفوا نفسي أوي انزل حالاً واروح وسط البلد..برتاح هناك اوي

بحب اتفرج على الناس وانا لوحدي

..وكمان نفسي ادخل مكتبة الشروق كالعادة

واجيب كتب كتيييييييييير

وافضل ساعة ونص زي اخر مرة جوا المكتبة لحد ما حس انهم هيطردوني منها



أنا مش هقفل التعليقات المرة ديه..بس ياريت بلاش كومينتات

من اللي بتجيب الضغط عشان انا اصلا عندي المرارة


نورتوني كلكوا