10.1.10

إلى كل المرابطين امام الكتاااب :)


الى كل المواطنين السهرانين والمزنوقين ف الامتحانات والذين جن جنونهم واللي على وشك


ازيكوا جميعا لقد عدت اليكم بحلة جديدة(جامد حلة ديه مش كده.. جهبوزة ف اللغة العربية يخبر ابيض^_^)

هتقولولي حلة ايه يا بعيدة بس ما تكلمينا عربي..طيب حاضر متزوقوش


أنا جاية في مهمة رسمية عشان ادعيلكوا ربنا يفك ازمتكوا ويفرج كربكوا ويارب تنجح يا تتح قولوا امين


نسبة لحالة الاكتئاب اللي كنت فيها منذ اسبوعين فانا حوشتلكو منابكوا(على رأي تيتة) يسعدني ويشرفني ان اقولكم..بعض النصايح الكئيبة للامتحانات..


النصيحة الاولى: اخويا صاحب الفضل في النصيحة ديه يارب تنجح يا احمد يااااارب(ادعوا ادعوا يمكن الدعا ينفع معاه طول عمره بينجح بالدعوات)


عليكم بالمعقم...ايوه معقم الايدي بتاع لونا الللي بيتباع ف الصيدليات ده ..اصل فيه كحول كتير والكحول بيعمل شغل ايييييييه مقولكوش اللي دماغه توزه وشوشو يلعب في دماغه وتقولو قوم نام يجيب المعقم يشرب منه شفطتين ويشتغل جربوا وقولولي النتيجة (ده لو فضلتوا عايشين يعني )



النصيحة التانية: لو اتزنقتوا في سؤال في الامتحان

الحل سهل وبسيط وبما اني معيدة بالتعليم الاساسي فانا مجرباها احفظوا كلمتين حلوين كده واكتبوهم للمصحح مثال: ايه القمر اللي بيعلملي الورقة ده يخرببيت جمالك مووووزة بس تبقى وقعتك سودة لو وقعت ف ايد جوز الموزة..قصدي المصححة



النصيحة التالتة: متروحوش الامتحان

ايوه اصل العلم ف الراس مش ف الكراس(ألفاظي بقت سوقية اوي مش بقولكوا جهبوزة ^_^ )



النصيحة التالتة: انت ومالك لأخيك

افرضوا ان الامتحان جيه رذل ورخم وواحد جمبك رذل ورخم تقوله غششني يقولك لأ...في الحالة ديه سيبوا الامتحان ايوننننن سيبوه خاااااااالص ركزوا مع اخينا ده واشتغلوه عاوزاه يقوم من جمبكوا على طول على برنامج دموع الندم حسسوه بالذنب انه مغششكوش وتبقوا كسبتوا فيه ثواب كان زمانه تايه في غيابات الروتين ..



النصيحة الرابعة:ركزوووووا

يعني مثلا نصكوا مخدش باله من ان حضرتي كتبت النصيحة التالتة مرتين..اوعوا تفتكروني مثلا يعني مش عارفة اعد بعد 3 ..لاااااااااااااااا كله الا كده ده ان علمي رياضة ^_^ده ان اللي اخترعت الــ رودي ماث

انتوا بس ركزوا



واخيرا: متشيلوش ف نفسيتكوا

..تؤ تؤ تؤ بتاتتتتتتتا البتة اطلاقا (يخبر ابيض عليا وانا بقول البتة ديه )

يولادي الامتحانات ديه مرحلة عابرة البنت مسيرها ايه بعد ما تخلص جامعة ...بيت الامة قصدي بيت جوزها

والولد يقعد يقشر بصل جمب مامته او يغرق ف الانترفيوهات واكيد اكيد مش هيشتغل



اما بعد اخيرا بقى احب انتهز الفرصة واغيظكوا شوية عشان انا مش همتحن ميد ترم (وش بيطلع لسااااااانه)(وش تاني برضووووا بيطلع لسانه)


سلام جامد جدا جدا للافوكاتو القمر لولا وزهراء بالمرة احسن تزعل وتقول عليا بفرق ^_^


وللباقي ربنا معاكوا بجد في التيستااااااات مقدرة ظروفكوا انا ف ايام الامتحانات اصلا مش بسرح شعري(اقصد ده العادي بتاعي يعني) بس بكون اصلا مزبهلة كده زيكوا تماماً وده السبب اللي بيخليني انصحكوا نصيحة اخوية ارجوكم متبوصوش ف المراية..ايوه بجد لو بصيتوا لنفسكوا ف المراية احتمال تتسرعوا


فرفشوا محدش واخد منها حاجة استودعكم الله يا ردالة ويا بنوتات :) ومتفضحوناش ارفعوا رآسينا (جمع رأس يعني)


...

I'm Back again :)