7.12.09

تااااااااااج



جالي تاج من عمرو وائل من كام يوم كده
ميرسي كتير ليك يا عمرو وبما اني نفسي ف مج قهوة كبييييييير دلوقتي فحطيت صورة ملهاش علاقة بالتاج ^_^ ندخل ف الجد عشان انا هموووووووت وانام وعارفة اني مش هعرف بس عاوزة برضه اااااااه بدأت اهيس ×_×
ركزوا كويس وكل اللي يقرا التاج يجيبلي مج كوفي ولكم جزيل الشكر واللي عنده دماغاية احتياطي يجيبهالي برضه مش هقول لأ..


اسمك؟
رضوى طارق..جاست سمايل




سنك؟
عاوزين انهي سن اللي ع الورق
ولا اللي الناس بتشوفني بيه
ولا اللي انا بحسه لنفسي؟؟




اسم مدونتك؟
وتستمر الحياة



مجال دراستك؟
طالبة لسه ف ثانوية عامة




هل فكرت فى اغلاق مدونتك والسبب؟

اها زمان فكرت في بداية ما كنت بكتب..
لقيت ان توبيكاتي بتتسرق وانا بعمل سيرش بالصدفة
واتضايقت جدا بس اخدتها عادي بعد كده واتأقلمت.




ايه رد فعلك لو حد قل أدبه عليك فى المدونة ؟
هرد عليه بكل ذوق ولو فيه لفظ خارج هحذف الرد بدون تفكير




أسوأ مدونة دخلتها ؟
لا كانوا كتير واخرهم واحدة بتنتقد مصر وعلاء مبارك بشكل مش لطيف وطريقة زايدة عن الحد.



هيحصل ايه لايميلك بعد ماتموت؟
أكيد مش هفتحه تاني عشان هبقى مشغولة ف حجات أهم :)




اديت الباس وورد لحد قبل كده؟
اها لصحبتي ولحد دلوقتي معاها اظن



السفر بالنسبة لك ايه؟

عالم اخر طبعا وده لأني عاشقة للخروجات وبحب اشوف ناس تانية واتعلم حجات جديدة واغير جو وابعد عن المشاكل والهموم وانسى نفسي شوية وكمان بستمتع بالتصوير في الاماكن المختلفة واعشق السفر لو جوا مصر أكتر من برا كمان :)



المود بتاعك؟
عموماً بحمد ربنا على كل حال..حاليا فترة صعبة اوي عليا بدون اسباب بس تعبانة..





بتعمل ايه فى وقت فراغك؟

بروح النادي العب تنس مع صحابي او بقرأ اي كتب أو اروح اتمشى في وسط البلد واروح عمر بوك ستور اجيب كتب
أو ممكن اخرج مع صحابي او اتفرج ع التي في او النت أو اقعد اكلم نفسي واضحك على مواقف ربما تكون من وحي خيالي..بس برضه بيتوقف ع المود بتاعي



الاكلات المفضلة؟
مش بحب الاكل عموما بس بميل للبيتزا والبشاميل والابل باي



الصفات التى اخذتها عن والدك؟
القيادة والسيطرة(بمعناهم الكويس ومش الانانية اقصد) والجدعنة والذكاء




الصفات التى اخذتها عن والدتك؟

كتير اوي بغض النظر عن اني شبهها جدا في الشكل فاخدت منها الطيبة والذكاء برضه والتسامح والتدين وكره المصالح وحب الغير وقلة الكلام (انا مش رغاية خاااااالص انتوا عارفين) :))



اكتر 6 حاجات بتحبها ؟
البحر..القمر..الصدق...صحابي..بلدي..الحركة والخروج على طول




كتر 6 حاجات بتكرها؟
النفااااااق بجميع انواعه...القمر....الفشل..الوداع..العجز عن التعبير
..الوحدة بكرههااااااااااااا وخصوصا
لما احتاج حد وملاقيهوش



شخصيتك نوعها ايه؟
غالبا مش عادية بحسها متناقضة اوي وقوية في الوقت اللي المفروض ابقى ضعيفة فيه متقلبة ومزاجية ومكركبة بس بنظام(معرفش ازاي ديه ) ^_^
بفكر كتير بغباء وبعاني بسبب التفكير ومش بعرف انام منه، شخصيتي عقلية اوي اظن وواقعية بس مش اوي





لماذا دخلت عالم التدوين من الاساس؟
كان نفسي اعمل مدونة زي واحدة قريتها مدونة فيها كل حاجة عن نفسها كنت فاكرة الموضوع ف البداية زي مذكراتي بكتبها..بس مقدرتش اكتب عن نفسي قدام حد مينفعش ابقى كتاب مفتوح حاولت بس فشلت وتقبلت الوضع اني بكتب بس محدش عارفة انا بكتب عن مين عن نفسي نفسي ولا نفسي مش نفسي .




اهمية التعليقات بالنسبة لك ؟
بشوف التعليقات جزء م الموضوع حتى ف موضوعاتي النقاشية مبكتبش كل حاجة لاني بنتظر التعليقات تكمل البوست نفسه.



حلى بوست كتبته مع ذكر السبب؟

تؤ أنا كل بوست بكتبه بيبقى من جوايا وليه ذكرى خاصة عندي يمكن متعنيش للي قدامي ليكوا يعني كتير بس عموما
انا بحب اوي فوضى قلم وشوية نعكشة وبعشق البوست ده من أنت ومن تكون




افضل مدونة قرأتيها؟
مفيش افضل فيه بوستات في مدونة معينة بتشدني والاقي احساسي بيميلها وممكن في مدونة تانية نفس الشيء فبختصار كل اللي بزورهم وبسيب تعليق عندهم بيعجبوني



اهمية الانترنت بالنسبة لكى ؟
نص حياتي..مقدرش استغنى عنه لأنه سبيلي الوحيد للتعبير عن نفسي بحرية من غير اي قيود



اهداء التاج ؟؟
كتير اصلا خدوا التاج ده.. بهديه لــ
Pink dreams
لولا وزهراء...معرفش ازاي اتصرفوا انتوا بقى ^_^ حتى جابوا مرتين

هناك 30 تعليقًا:

Pink Dreams يقول...

ناخد بقى اول تعليق كدا قبل ما حد يجى

Pink Dreams يقول...

وناخد بقى التانى كمان

3mr wa2el يقول...

تاني تعليق مش مشكلة

هههههههههههههههههههههههههههههههه

Pink Dreams يقول...

ميرسى ليكى يا قمرايه على التاج

بس انا كنت عملته قبل كدا

ودا الرابط

http://oshena.blogspot.com/2009/11/blog-post_10.html

3mr wa2el يقول...

شكرا يا ماجستي على انك قبلتي التاج
ورديتي علية

و ان شاء الله تكوني ملكة ف الحقيقة يوما ما ياااارب

كلامك حلو اوى و احساسك بنوتي رقيق يميل الى الرومانسية

و جدعة و بنوتة ربنا يحميها

تحياتي

Pink Dreams يقول...

على فكره اجاباتك حلوه قوى

وعرفتنا حاجات كتير عن شخصيتك الجميله

3mr wa2el يقول...

بالنسبة للقهوة نفسي ف كوباية قهو عذاب كاس العذاب بس يا ترى مين هيعمل لا تعليق هههههههههههههههههههه

amirelhob يقول...

انتى وجيتى وقتلى علي اجابتى جميله وارئعه فى البوست تسمحيلى بقى انى انا اقولك ان اجابتك احلى بكتير واجمل بمراحل فيها حس جميل هادئ فيها لغه شقاوه نوعا ما او فيها روح طفله جواها مرح ونوعا من الحزن بتحب اصحابها والخروج بترفض اى سجن بتعشق الحريه يمكن دا مش مكتوب فى الاجابت بس انا دايما بحب اقرئ اللى بين السطور مش بس اللى مكتوب ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

لولا وزهراء يقول...

الجميله الرقيقه رضوى
اسمحى لى انى اقول عليكى رقيقه لان ده شعورى بجد من اجابتك انك حد رقيق اوى
وبعدين كده انا عرفت انكى بتحبى البييزا يبقى اجيب معايا وحداه سوبر سوبر كومبو لاحلى رضوى
ربنا يوفقك فى الثانويه العامه وان شاء الله تحققى كل احلامك
وتدخلى الكليه اللى تفضليها
وبعدين اطمنى ماحدش يقدر يفكر حتى مجرد تفكير انه يقل ادبه لانك حد محترم اوى اوى
ربنا يكرمك ويفرح قلبك
وشكرا على التاج وان شاء الله نجاوب على الاسئله كلها
تقبلى ارق التحايا

لــــــــولا

لولا وزهراء يقول...

رضوى الجميله
ايه الكلام المنظم المنمق اوى ده كله
الاول قبل ما انسى انا كان نفسى اجيب معايا مج بن كبييييييييييير انتى عارفه انى كنت ولازلت من عشاق القهوه بس افضل انى اشربها فى فنجان وكنت زمان بعد ما اخلص شرب الفنجان اقعد اتفرج على الرسومات اللى فيه
استغربت بس من حاجه صغيروه خالص مالص وهى انك قولتى انك بتكرهى القمر ليه يا قمر
فى وجه تشابه بينا وهو ان النت تقريبا نص حياتى
موشكرين على التاج وان شاء الله نجاوب مرتين
كلامك جميل زيك كده بالضبط يا ارق رضوى فى الدنيا كلها

زهراء

مي يقول...

ايه يابت ده والنعمة جبارة لالالالالالالا انتى لسة صغننة اوى بس ماشاء الله عقلك كبير
ممممممممممموش بيغمز
اجاباتك حلوة اوىىىىىىى وتاج جميل جدا
انا سعيدة انى اعرف حد جميل زيك
تحياتى

همس الارواح !! يقول...

حبيبتى يارضوى ازيك عامله ايه
وحشاااااااااااااااانى موت

التاج جميل اوى

تصدقى انا اول ما دخلت جيت هنا علشان اشوفك على طول

وحشانى ياعسل
خدى بالك من نفسك
اموووووواه

Just Smile يقول...

شيماااء بينكي :)

مبروك التعليق الاولاني يا جميل..
تمام كده انتي اعفاء من التاج بس متتعوديش على كده ^_^

Just Smile يقول...

عمرو

احساسي بنوتي رقيق يميل للرومانسية؟؟؟مظنش خالص انا ابعد ما يكون عن الرومانسية ديه اظن..

ميرسي ع التاج الجميل وربنا يوفقك يارب وبلاش موضوع القهوة ديه احسن ده ادمان ^_^

Just Smile يقول...

أمير الحب :)
أستاذ عمرو

تاني مرة حد يقرالي اللي بين السطور بالبراعة ديه..ف الواقع انا احييك على بعد نظرك وخصوصا ف جزئية حب الخروج واصحابي وميلي للحرية

بس نسيت حاجة مهمة اني بحب مدونتي اوي والناس اللي بعرفهم من عليها ^_^

ربنا يسعدك ويكرمك يارب

Just Smile يقول...

لــــــــولا :)

مش عارفة اقولك ايه على كلامك الجميل ده فعلا انتي حد بحبه جدا مع زهراء طبعا ^_^ هنتمسك امن دولة وبحترمكوا برغم اني معرفكوش اوي ..

منوريني ومتسيش البيتزا مش هدخلك هنا من غيرها :)


تحياتي ليكي

Just Smile يقول...

زهراء

والله مش كلام منظم ولا حاجة يا زوزوهايتي ده جيه ف لحظة تهييس ليس الا ^_^

حبيبتي بتحبي القهوة زيي ^_^ بس انا بشربها في كوباية او مج كبير بس مش اوي ولعلمك انا بعمل القهوة جمدة جدااااا :) لازم اعزمك عندي مرة ان شاء الله ف اقرب فرصة وتشرحيلي الرسومات اللي ف الفنجان ^_^

*
استغربت بس من حاجه صغيروه خالص مالص وهى انك قولتى انك بتكرهى القمر ليه يا قمر
*

الوحيدة اللي لاحظتي كده..بصي انا مش بكرهه لسبب شخصي ولكن انا بحسه زي البشر بالظبط تشوفيهم من بعيد ملايكة ويبانلك ان الشخص اللي قدامك مفيش زييه بس بمرور الوقت بتكتشفي ان ده كله فشنك ..وش مزيف..نفاق ..وبعدين يظهرلك الحقيقة
بالمثل القمر من بعيد تشوفيه منور وجميل اوي لكن لو رحتي عنده ونزلتيه عليه هتلاقيه مكان معتم مفيهوش اي سبب من اسباب الحياة مكان قاسي وبارد كله صخور..يعني من وجهة نظري هوا المثل الاكبر للنفاق..بس تعرفي انا برضه بحبه زي ما بحب البشر مبقدرش امنع نفسي.

مستنية اجاباتكوا ومنوريني والله وبفرح جدا لما بلاقيكوا عندي
ميرسي يا زهراء

Just Smile يقول...

مي..

اعوذ بالله يابنتي خضتيني هوا انتي كده دايما مفيش عندك احم ولا دستور ^_^

ربنا يخليكي يا ميوياااا انتي اجمل ومنكم نستفيد برضه (بس ابعدي عن الكآبة وخليكي ف بوستات التسول افضل)

انا اسعد والله يا مي ميرسي

Just Smile يقول...

هوووووب

انتي يبنتي انتي فين ده انا اللي ف ثانوي المفروض اختفي مش انتي اللي تختفي ومبتطمننيش عليكي ولا اي حاجة..طيب يا هبة لينا ميل ^_^

ماشي ماشي اضحكي عليا :)
يااااارب تطمنيني عليكي بقى والاقيكي منورة كده اون لاين مرة من نفسي^_^

ربنا يسعدك يارب

amirelhob يقول...

اولا ميرسى على انك بتهتمى بتعلقياتى وتردى عليها ثانيا مفيش استاذ عمرو انا ممكن اكون من اصغر المدونين فى البلوج ثالثا ودا الاهم انا يمكن فعلا مخدتش بالى من انك بتحبى المدونه اوى بس دا مش لانى مخدتش بالى لكن دا لانى مقرتش الحته دى بين سطور مش عشان دا مش صح لكن عشان انا بشرى زى كل البشر ممكن يخونى ذكأى وبالنسبه ليا عدى انى اغلط لانلا بشر وفعلا انى مهتمها كمان بمدونتك واصحابك ودى احلى ما فى المدونه يا قمر ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر وسورى لان الكومنت اللى فات كان فيه غلطات املائيه بس عشان لسه متعلم اكتب ارابك قريب

blackshwak يقول...

السلام عليكم

أول تعليق ليا في مدونة حضرتك

شفت تعليق حضرتك
عند مي ( رحيق الورد )

قلت آجي أطل
لقيت كلام حضرتك لذيذ
طريقتك في صياغة الكلام - رغم صغر سنك - جميله

وبإذن الله اكون من المتابعين

وأتمني أشوف حضرتك في مدونتي

تقبلي مروري

Timo.. يقول...

رضوى..
البوست حلو..بس حسيت من تحت لتحت كده انك ممكن تكوني متقلبة جدا (';')
وعاوز اقولك انا كمان عجبني بوست:
من أنت ؟؟ومن تكون؟؟
جدااااااا..

Just Smile يقول...

أمير الحب.. أنا مقدرش استحالة الاقي تعليق من اي حد واهتمام واتجاهله هبقى بجد وحقيقي شريرة اوي انا شريرة نص نص بس ^_^

على فكرة انا كنت بهزر ف موضوع البلوج ده انا بالفعل بحبه جدا وبحب كل الناس اللي عليه ولكن انا موضحتش كده ف اجاباتي انت عندك حق :)

ولا يهمك انا فاهمة مش مهم الاخطاء الاملائية ديه حجات ملهاش قيمة كبيرة عندي

منورني

Just Smile يقول...

blackshwak

لحسن حظي طبعا انك جيت عندي هنا الظاهر ان مي عاملة شغل جامد ليها عندي شوكولاتايه وان شاء الله همر على مدونت حضرتك :)

متشكرة اوي بس ياريت بلاش صغر سنك ديه عشان مبحبهاش ^_^

Just Smile يقول...

Timo

جدا جدا وده العادي من بنك مصر :)

اتفضله يا تيمو ميغلاش عليك البوست والمدونة كلها (بس مش اوي يعني )^_^

ميرسي لمرورك

micheal يقول...

إيه حكاية التاج ده..أنا بقيت أخاف لا البوست سكون فيروس وبيستهبل
:))
عموما ادنيا بنعرف شوية معلومات لذيذة عن بعض
في إنتظار بوست ما بعد التاج
تحياتي

blue-wave يقول...

مبسوط جدا ان اول تعليق ليا عندك يكون فى تاج
علشان اعرفك اكتر من البدايه كدا
وبجد اجاباتك رااائعه وتدل على شخصيه عاقله وناضجه
تحياتى ليكى

Hager Za3bal يقول...

عجباني اجاباتك :))))))))

Just Smile يقول...

مايكل..

ميرسي ليك اوي ومعرفش فعلا التاج ده انتشر اوي كده ليه ^_^ معندهمش تاجات غيره..ولا التاجات غليت اليومين دول

Just Smile يقول...

blue-wave

انا مبسوطة اكتر وحضرتك نورتني..


Hager Za3bal

:) متشكرة اوي اوي على زوقك وردك الجميل ده..