1.12.09

عجايبك يا مصر عجايب..!!


لربما خرج الهرم الأكبر من قائمة العجايب السبع القديمة وبقى حتة مبنى زيه زي كشك اللب اللي على أول الشارع.... ولكننا وبلا فخر لا نزال نتصدر قائمة العجايب الدنيوية في العالم كللللله وبلا منازع مصر أخدت علامة الايزو ^_^

متبوصليش كده أنا مبقولش ألغاز والدليل هقولهولك... إحنا عندنا الموظف الغلبان اللي بيقبض 120 جنيه ف الشهر فاتح بيت وعنده دستة عيال وملبسهم ومأكلهم ومشربهم ومروحهم ديزني لاند ودريم بارك بـــ 120 جنيه بركة يولااااااد ..بقى بالزمة ديه مش عجيبة لا تتكرر في أي بلد تاني..


طب بلاش ديه شكلكوا مش مصدقيني..عندكوا أي ورقة ممكن تكون بتخلص في خلال ربع ساعة بنخلصها ف 4 شهور..أصل الموظفين بيحبوا الونس ولازم يبقى جمبهم طوابير عشان يحسوا بسعادة..


ولما يكون عندنا حوالي 50% من الشعب اللي هما اصلا 83% تحت خط الفقر وكله عايش تمام ومبسوط ومش كده وبس ده العدد بتاعهم بيزيد وشغاااااال يونيفيرسال..


بس أظرف عجيبة م العجايب هيا انتخاباتنا منتهى الانصاف ماشاء الله مبتقلش عن 99.9% ديموقراطية درجة أولى يخواتي :)


ومن عجايبنا وديه أكتر حاجة بحبها أنه شعب ممتاز وقادر بشكل غريب على مواجهة أزماته ومشاكله..ولا خنازير بتحوق معانا ولا طيور بتفرق وخليها على الله :)


بصوا م الاخر مصر مليانة عجايب ألبسوا النضارات بتاعتكوا واللي نظره مش ضعيف ولا يهمه ممكن يلبس لينسزز ..وبصوا حواليكوا كويس هتلاقوا في كل خطوة بلاعة..قصدي عجيبة


كانت معكم من البلاعة على أول الشارع رضوى / كيكي كايرو/ جيجي ايجيبت

:)

هناك 12 تعليقًا:

3mr wa2el يقول...

عجيبة انك تكتبي كدة

بس بجد بجد تحفة اسلوبك حلو جدا

lostlove يقول...

عجيب في العجيب بس جامد صح الصح كلامك
ربنا يوفقك وتكتبي احلي من كده كمان وكمان والاسلوب لزيز جدا بيوضح وجه نظر بطريقه ملهاش حل
اتمني التوفيق

اقصوصه يقول...

loooooool

Just Smile يقول...

عمرو وائل..

:) ميرسي ليك بس مش عجيبة اني اكتب كده اصل الفاضي يعمل ايه...يكتب اي حاجة ^_^

ربنا يخليك يارب يا رافع معنوياتي

Just Smile يقول...

lostlove

ميرسي يا قمراية تسلمي على زوقك وكلامك الرائع ده

Just Smile يقول...

اقصوصة..

منوراني مرورك ليه طعم لذيذ

amirelhob يقول...

لا هو فعلا لو فى عجيبه يبقى عجيبه انى افضل اضحك الضحك دا كلو على الكلام اللى صح جدا ويموت من الضحك جدا جدا وكلامك بجد حلو اوى ومعبر فعلا وعندنا فعلا المشاكل دى بس زى ما قالتى احنا كلنا عجايب فى عجايب شعب عجايب وحكومه عجايب ورئيس عجايب واثار عجايب ودراسه عجايب ربنا يستر علينا ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر يا اجمل قمر

Just Smile يقول...

أمير الحب:)

ربنا يسعدك يارب وتفضل تضحك على طول^_^
عندك حق كل حاجة عجيبة وياما هنعيش ونشوف ..

ميرسي ع الكومينت اللذيذ ده منورني والله بردودك دايما

Timo.. يقول...

اول مرة اجي هنا...واخدت جولة جوة المدونة..وعجبني قوي البوست اللي بتتكلمي فيه عن البلياتشو..
وافتكرت اغنية:
(الدنيا دي فيها كام بلياتشو..)
بس ها اضيف لها كلمة مليون قبل بلياتشو.

Just Smile يقول...

تيمو

أولا شرفتني بزيارتك..
اها عندك حق..بحب الاغنية ديه اوي بس الغريب ان البلياتشو مبيبقاش عارف انه بلياتشو..عايش وخلاص

منورني وابقى تعالى تاني ^_^

لولا وزهراء يقول...

والله عندك حق يا رضوى
مصر دى بلد العجايب
انتى عمرك شوفتى فى اى مكان فى العالم كله القطار يتاخر عن ميعاده طبعا ممكن تشوفيه فى مصر
اى حاجه غريبه عجيبه لازم بعدها تقولى يبقى اكيد اكيد فى مصر

اسلوبك عسل بجد
انتى كمان شخصيه عسوووووووله اوى اوى

زهراء

لولا وزهراء يقول...

الجميله الرقيقه رضوى
كلامك صح والله
الواحد بيشوف العجايب بس مهما حصل هى دى مصر امنا اللى بتحبها ونموت فى ترابها كمان ومهما جت لى فرص كتير للسفر مش ممكن اسيبها لانى اعشق كل ما فيها

لـــــــــولا