15.9.09

على ناصية شارعنا"المبدأ الأصولي في التفكير"



على ناصية شارعنا بيقف مجموعة من الشباب بالليل بيتناقشوا ف مشاكلهم واحوال البلد واللي بيحصل في الدنيا ..في الواقع انا لم اكن اعيرهم اي اهتمام ولا استمع حتى اليهم واهتم فقط بشؤني الخاصة ولكن الحوار بتاعهم المرة ديه شدني أوي وفي الواقع كان حوار ساخن جدا
وكان عن المبدأ الأصولي ف التفكير اللي بدأ صوتهم يعلى فيه فوق العادة بس للي لا يعلموا احب اوضح


ما معنى الأصولية ومن همك الأصوليين؟


الأصوليين هم طائفة من المسلمين المتشددين المتعصبين وبشدة وبيسيروا على نهج السنة لا بيزودوا ولا بينقصوا ويمعنى آخر ملتزمين بالنص لدرجة انهم معندهمش مرونة ولا يسايروا متطلبات العصر والزمن ولا يتقبلوا التغيير حتى لو كان للأفضل طريقة الرجل لازم يقوم بإطلاقه لحيته، و تقصيره جلبابه.. و للمرأة: نقابها ...وأي حد معندوش لحية او امرأة بدون نقاب يبقى كده اسلامهم نااااقص وده بيشوه صورة الاسلام عند بعض الناس وبيحسسهم ان الاسلام دين تعصب وتشدد ولكن الاسلام دين مرونة وتسامح ورحمة.
والأصوليين غير مرنين لدرجة انهم لو سمعوا كلمة تجديد اول كلمة يقولوها

اهذا التجديد قام به الرسول؟؟

فاذ لم يفعل فخلاص الموضوع انتهى بالنسبه ليهم
ومفكروش اصلا ان ايام الرسول مكنش فيه الانفتاح ولا عربيات ولا كمبيوترات
ودلوقتي العولمة انتشرت والعالم اتغيرغير زمان نهائيا
لكن هما زي ماهما
بالنسبة لهم اصبح كل جديد منبوذ مكروه
حتى لو حبذه العقل
ومش بيرجعوا للمواقف السابقة اللي حصلت في التاريخ والزمن

زي زمان مثلا كلنا عارفين كان السارق تقطع يده كعقاب ،طيب جيه عمر بن الخطاب رضي الله عنه وارضاه القائد العظيم الفاروق فيه رجل سرق على ايامه في عام يسمى عام القحط ولكنه لم يقطع يد الرجل ولكنه عاقبه وده بيدل على مرونة اسلامنا وان الظروف بتدعو وتحكمنا سعات الي التغيير.

ده حتى الثعابين بتغيرجلودها علشان تتأقلم والحرباء بتغير لونها.


طيب سؤال بسيط هل ديننا الاسلام دين جمود؟


اكيد الاجابة البديهية عندنا هنقول لأ لكن بالنسبة ليهم اه ،،مش لازم نفكر في الدين بل ننفذ فقط السنن والشريعة
طيب هوا مش ربنا عرفوه بالعقل برضه وربنا أمرنا بالتفكير ولو اصلنا مفكرناش في الدين واقتنعنا اي حد تاني يجي يقنعنا بكلامه هنقتنع بيه ما احنا لازم نفكر برضو وإلا مكنش الناس الغير مسلمين اسلموا ،وكان الدين يقتصر بس على الذين وُلدوا مسلمين.
بس تعرفوا اكتر حاجة استغربتلها ف الحوار ده...
إن الاصولي لو اختلف مع حد في وجهة النظر ممكن يسمح لنفسه انه يضربه بالرصاص طيب بالله عليك هو الرصاص كانوا اخترعوه ايام الرسول ولا انتوا بتاخدوا اللي عاوزينه وتتمسكوا بشكليات ويمكن باطنكوا عكس ظاهركوا وفالحين بس تشوهوا صورة الاسلام قدام العالم .
على رأي الي قالوا


اخدوا من الرسول الجلباب واللحية وتركوا الأخلاق!!!!!!




تعرفوا لما نسأل نفسنا ليه الاصوليين دول وصلوا لكده؟؟ عشان اكبر نعمة لربنا على الانسان مش بيستخدموها لو فكرنا بالعقل هنفهم وهنحب ديننا ولو فكرنا صح مكناش نوصل للي احنا فيه ،،ربنا يهدينا جميعا ويا جماعة بالله عليكوا فكروا وصدقوني هنتغير لما نفكر صح

هناك 4 تعليقات:

Try Not To Cry يقول...

ازيك يا بت عاملة ايه .. يا رب تكونى كويسة .. ندخل بقى ف المناقشة يا حجة كلنا بنعرف ان التعصب فى الدين ممكن يرسم صورة وحشة عن الاسلام فى جميع البلاد وجميع العقليات الغير مسلمة ودا مش بيحبب بقية البيشر فى ديننا بل بالعكس بيجعلهم يزيدوا من كرههم وبعدهم بعد ما أيقنوا ان الاسلام خلاص دين سماحة وفضيلة ويسر فى التعامل والتصرف وكل شئ ودين الوسطية .. دينا يا جماعة دين جميل ويسير لكن بعض المتعصبين والمتشددين لدرجة العماء يجعلون من هذا الدين شئ يكرهه الناس ع العكس ان ديننا الدين الوحيد الذى يحبب الناس فيه لما فيه من يُسر واعتدال فى الحكم وسماحة .. والله يا اختاه لو اتكلمنا فى الموضوع دا مش هنخلص وهخلص ورق مدونتك يا حجة ...

ريحانة الاسلام يقول...

الصراحة الموضوع كبير اوى
محتاج بحث وكلام كتير
وجزاكى الله خيرا انك فتحتى الموضوع ده يا رودى
وكمان من غير مسميات اصولى او مش اصولى
فى ناس متعرفيش تتكلمى معاها
متعرفيش ليه
حاجة مش حلوة
احنا كان لينا واحدة صحبتنا صعبة شوية بس مش للدرجة دى يعنى
بس كانت شديدة معانا شوية
ولما اختلطت بينا اكتر وحسبتها صح
اتغيرت للاحسن كتيييييير جداااااا
وبينى وبينك مكناش بنطقها
بس دلوقتى عايزة اقولك انها بقت انتييييييييمى
بجد لو الناس دى تفهم هتتغير
همه بس محتاجين حد يكلمهم بطريقة مختلفة
بس ربنا يهدينا ويهديهم
وكلمتين كده بردو من غير ما حد ياخد باله
هاموت واكلمك بجد وحشتينى اوى اوى اوى يا رودى
لو اعرف ان المنتدى والبلوج والفيسبوك هياخدوكى منى كنت قطعتهم
والله وحشتينى اوى اوى

Just Smile يقول...

يا مساء الانوار ميدو عندي بذات نفسيته :) انا الحمد لله كويسة متقلقش
فعلا يا محمد معاك حق محدش ابدا يحب التعصب واحلى شيء ف العالم الوسطية ومش معنى ان انا مسلم اني اروح البس الجلابية واعمل عملية اهابية بالعكس ده احنا دين السلام ..
يسلم كيبوردك يا محمد ونورت البلوج كله على بعضه والمدونة مدونتك خلص ورقها احنا مبيهمناش ^_^

Just Smile يقول...

سيرووووووووووووو يا اهلا بايتالي كلها ويارب قريب اقول يا اهلا بزيكو هههههههههههههه
فعلا يا سارة فيه ناس كده بتتذمت وتتمسك برأيها بطريقة غريبة فاكرين انهم كده ماشيين صح ومش بيحيدوا عن الخط اللي هما فيه ناس على طول جد الابتسامة بتطلع منهم بالعافية ويحسسوكي انك مذنبة عشان بتبتسمي او بتهزري وده بيخلينا نكره التعامل معاهم.
وصحبتك اتغيرت عشان اما عرفتكوا لقت انكوا متوسطين وف نفس الوقت متدينين والحمد لله
ربنا يهدينا ياااارب
ملحوظة على جمب وكلوا يغمض عينوا عشان هقولها سر في ودانتينها ^_^

والله وحشاني اكتتتتتتتتتتتر بس على فكرة العيب مني مش من المنتدى عشان انا مش بدخل اصلا غير قليل واما بقعد بفتح المسنجر خلاص خرجت من العزلة ونزلت الياهو :D