مستشفى ايه مستشفى مين؟؟؟؟
طبعا عنوان غريب أوي بس بجد انا لحد دلوقتي مش مستوعبة اللي حصل ومذهولة جدا بصوا انا هحكي اللي حصل وانتوا احكموا
اللي حصل اني من شوية كنت في مكان كده قال ايه بيقولوا عليه مستشفى!!! طبعا بتقولوا غريبة ديه باينها خرفت ع قبل الامتحانات بس فعلا ديه مش ممكن تكون مستشفى انا شفت في حياتي مستشفيات كتير وقليل إلا ديه لا لا لا ديه حاجة تانية خالص
عموما الحمد لله على كل شيء بس فجأة كده تعبت وبما ان امتحاناتي بعد بكرة فبابا وماما اصروا اننا نروح لدكتور المهم رحنا بالعربية زي كل الناس عادي جداً بس بمجرد ما دخلت المستشفى حسيت أن مصر كلها بتستقبلني أصل أنا شخصية مهمة ههههههه
لا فعلا حسيت أن مصر كلها في المستشفى وفعلا حسيت بخطورة الزيادة السكانية مع أني مكنتش مركزة
دخلت المستشفى وأنا عندي دوخة والقاولون تاعبني خرجت بالمرارة والضغط وصداع زائد اللي كنت رايحة بيه من أمراض والحمد لله...
ههههههههههههههه اضحكوا اضحكوا لأني شفت النهارده اللي عمري ما شفته لا تقولي روتانا ولا الايه ار تي..
بصوا بقى أولا المستشفى مفيهاش غير ممر ضيق جدا ميمشيش فيه أكتر من صف واحد يا إما اللي خارجين أو اللي داخلين ده زائد الكراسي اللي محشورة تقريبا الناس كانوا بينطوا فوقها عشان يعدوا.
ثانيا أنا قرأت 70 لافتة مكتوب عليها ممنوع التدخين وبرضوا فيه دخان تقريبا حد كان بيشوي حاجة في عيادة الأطفال جوه ههههههههههههه
ده غير سبعين لافتة تانيين مكتوبل عليهم الرجاء الهدوء حفاظا عهلى سلامة المرضى بس بتقول لميييييين أنا كنت في كوفي شوب مش مستشفى أبدا آه يا صداعي يا مامي.
وكل ده كوم ولا الدكاترة كوم اوه ماااااااي جودنيس بسم الله ما شاء الله مفيش عيان يقعد مع الدكتور أكتر من دقيقتين على بعض هههههههه لا أمال ايه سرعة في الأداء الطب اتقدم يا جدعان يحلاوة يولاد.
المهم بعد ساعة إلا ربع من المعاناة ولا أكني داخلة الموساد مش دكتور باطنة المهم يعني أخيرررررا دخلت وحسيت بفرحة ولا أكنه عيد تحرير سينا ويارتني ما فرحت ...........
دخلت واذا بواحد شبه عم عبده البواب بالعمه بتاعته بالجلابية سبحان الله هو الخالق الناطق عم عبده ولقيته بيسألني ها حاسة بإيه؟؟
- نعممممممممم هوا حضرتك الدكتور؟؟؟!
تعرفوا لو كان قالي ايوه أنا الدكتور، كنت مسكته من عمته وعلقته في المروحة بس لحظه السعيد مكنش دكتور عرفتوا بقى مين ده ولا اندهوا لعم كرومبو يحللكوا اللغز؟؟؟؟؟؟؟؟ لا خلاص هقولكوا انا ده كان أحد ملائكة الرحمة تقريبا يعني.
الدكتور مسك الترمومتر يدوبك مكملش 7 ثواني بالعدد مأخدتش في ايده غلوه وإذا به بيقول عال عال عال وأنا أصلا الكلمة ديه بتجبلي إحباط..
ماما بتقوله عندها ايه قالها لا حاجة بسيطة واذا بالفليسوف نطق وياريته ما نطق :بسيطة مجرد القاولون هايج وغالبا بسبب ضغط وعندها برد في معدتها وعندها دوخة ....يعني أنا عاوزة من الآخر ظبط زوايا واعادة ترميم وتركيب ،،خسعت على اخر الزمن ههههههههههههه
ولقيته ماسك الروشتة وكاتب حوال خماشر عشرين دوا كده وأنا قاعدة اتفرج ومن جوايا ميتة ع روحي من الضحك هههههههههههههههههههههههه أنا ايه اللي جابني هنا ومين اللي شار عليا الشورة المنيلة ديه.
--------------------
حقيقي من غير سخرية الموضوع خطير أوي يعني أول مرة في حياتي ادخل مستشفى عامة أشوف كده طيب أنا والحمد لله اقدر اتعالج في أي مكان بس الناس الغلابة يا ترى مكتوب عليهم انهم يعانوا كده مش كفاية معاناة المرض وكمان هيبقى معاناة دكاترة أذكياء وممرضين ملايكة مش حرام اللي بيحصل ده ،مش حرام الواحد يروح تعبان يرجع تعبان أكتر فعلا الموضوع ده محتاج نظام أكتر من كده واهتمام ازيد لأن بجد أنا مش راضية عن اللي شوفته وبضحك من الصدمة مش أكتر
،ربنا يصلح أحوالك يا أم الدنيا وترجعي أحلى بلد في العالم
تحـــــياتي
